Пагоҳ даври ниҳоии озмуни «Биё бо ҳам бихандем» оғоз мегардад

ДУШАНБЕ, 01.03.2017 /АМИТ «Ховар»/. Пагоҳ, 2 марти соли 2017, дар қасри фарҳанги шаҳри Турсунзода даври ниҳоии озмуни ҷумҳуриявии телевизионии ҳаҷвнигорон таҳти унвони «Биё бо ҳам бихандем» оғоз мегардад. Дар ин бора аз Вазорати фарҳанги Ҷумҳурии Тоҷикистон иттилоъ доданд.
Озмуни ҷумҳуриявии телевизионии ҳаҷвнигорон бахшида ба таҷлили ҷашни Наврӯзи байналмилалӣ баргузор гардида, дар он дастҳои ҳунарӣ аз шаҳру навоҳии кишвар, ки дар даври аввал ғолиб омада буданд, байни ҳам қуввасанҷӣ мекунанд.
Мақсади асосии озмуни ҷумҳуриявии телевизионии ҳаҷвнигорон таҳти унвони «Биё бо ҳам бихандем» ривоҷу равнақи фаъолияти гурӯҳҳои ҳаҷвнигорони шаҳру ноҳияҳои мамлакат, пайдо намудани чеҳраҳои нав, ҷалби бештари мардум ба ҳаҷв, бартараф намудани камбудию норасоиҳои ҷомеа ва фароҳам овардани шароити хуб мебошад.