Пешвои миллат: «Зарурати пайдо намудани василаву заминаҳои ҳамкории самарабахши ҷавобгӯ ба манфиату ормонҳои мардумонамон ба миён омадааст»

ДУШАНБЕ, 02.03.2017 /АМИТ «Ховар»/. Бо вуҷуди дастовардҳо, ҳанӯз ҳам иқтидорҳои бузурги ҳамкории мутақобилан судманди кишварҳои аъзои Созмони ҳамкории иқтисодӣ пурра истифода нагардидаанд. Ин матлабро Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни суханронии худ дар Иҷлосияи 13-уми Созмони ҳамкории иқтисодӣ, ки 1 март дар шаҳри Исломобод сурат гирифт, таъкид намуданд.
-Аз ин лиҳоз,- гуфт Пешвои миллат,- вазифаи умумии мост, ки василаву заминаҳои ҳамкории самарабахши ҷавобгӯ ба манфиату ормонҳои мардумонамонро пайдо намуда, татбиқи онҳоро таъмин гардонем. Мусоидат ба ҳамгироии бештару васеъ, фаъол гардонидани дастгирии ҳамдигар, тавсеаи тиҷорат ва сармоягузорӣ ҳамчун унсурҳои калидии ҳамкории минтақавӣ аз ҷумлаи самтҳое мебошанд, ки барои мо бояд дар мақоми ҳадафҳои стратегӣ пазируфта шаванд. Ҳамчунин Президенти кишвар дар идомаи суханронии худ изҳор доштанд, ки дар шароити имрӯза ташаккули низоми мукаммали нақлиётиву транзитӣ василаи муассири мусоидат ба раванди рушди тиҷорат ба шумор меравад. Дар баробари ин, истифодаи самараноки захираҳои энергетикӣ ва эҷоди низоми пайвандгари энергетикӣ аз ҷумлаи самтҳои муҳими ҳамкорӣ боқӣ мемонанд. Дар ин замина имрӯз ва дар ояндаи наздик моро зарур аст, ки ба татбиқи лоиҳаҳои инфрасохтории муштарак, ки ба пайвастшавии шабакаҳои нақлиётӣ ва энергетикии кишварҳои аъзои созмон мусоидат мекунанд, диққати дучанд диҳем.
Ҳамзамон Эмомалӣ Раҳмон изҳор доштанд, ки ба роҳандозии фаъолияти лоиҳавии созмон ҷиҳати мусоидат ба рушди иқтисодиву иҷтимоии кишварҳои аъзо, паст кардани сатҳи камбизоатӣ ва боло бурдани некӯаҳволии мардум бояд таваҷҷуҳи хосса зоҳир карда шавад.