Саноатчиёни мамлакат Наврӯзи байналмилалиро таҷлил карданд

ДУШАНБЕ, 17.03.2017 /АМИТ «Ховар»/. Имрӯз дар Вазорати саноат ва технологияҳои нави Ҷумҳурии Тоҷикистон бахшида ба ҷашни Наврӯзи байналмилалӣ барномаи фарҳангӣ баргузор гардид.
Дар ҳамоиш Шавкат Бобозода, Вазири саноат ва технологияҳои нави Ҷумҳурии Тоҷикистон иброз дошт, ки Наврӯз дар ҳама давру замон дар байни мардуми ориёӣ бузургтарин ҷашни миллӣ ба ҳисоб мерввад. Ин ҷашн аз гузаштаҳои хеле дур то имрӯз барқарор монда, мавқею эътибори худро ҳифз кардааст.
«Баъд аз байналмилалӣ эълон гадидани Наврӯз халқи тоҷик онро дар сатҳи ҷаҳонӣ дар баробари зиёда аз 300 миллион нафар сокинони сайёра, ки ба Наврӯз эътиқод доранд, ҷашн мегирад. Тамоми ойинҳои Наврӯз сарчашмаи бузурги ахлоқию тарбиявӣ, ҳамдигарфаҳмию зебоӣ ва бунёдкориву созандагӣ мебошад. Наврӯз дар баробари шукуфоии табиат шодиву сурур ва меҳрубонӣ оварда, инсонро ба ояндаи нек, рӯзгори обод ва покизагӣ ҳидоят мекунад»,- гуфт Шавкат Бобозода.