160 ширкати Ӯзбекистон молу маҳсулоти худро дар Душанбе ба намоиш мегузоранд

ДУШАНБЕ, 12.04.2017 /АМИТ «Ховар»/. Беш аз 160 ширкати бонуфузи Ӯзбекистон маҳсулоти худро дар ярмарка-намоишгоҳе, ки аз 17 то 21 апрели соли равон дар Маркази савдои «Пойтахт -90» доир мегардад, ба намоиш ва фурӯш мегузоранд.
Намоишгоҳ бо ибтикори Палатаҳои савдо ва саноати ду кишвари ҳамҷавор Тоҷикистон ва Ӯзбекистон созмон дода шуда, ҳадафаш тақвияти робитаҳои иқтисодию тиҷоратӣ байни ду кишвари ҳамсоя арзёбӣ мегардад.
Интизор меравад, ки дар намоишгоҳ маҷмӯи молу маҳсулоти саноатии бахши мошинсозӣ, техникаи кишоварзӣ, саноати кимиё, саноати сабук, дорусозӣ, дастгоҳу таҷҳизоти барқӣ, масолеҳи сохтмон, инчунин хӯрока, либос, қолин ва дигар маҳсулот барои рӯзгор ба намоиш ва фурӯш гузошта мешаванд.