Ҷавонон неруи созанда ва пешбарандаи ҳар қавму миллат мебошанд
![](https://khovar.tj/wp-content/uploads/2017/04/avonon-ner-i-sozanda-va-peshbarandai-ar-avmu-millat-meboshand.gif)
ДУШАНБЕ, 27.04. 2017 /АМИТ «Ховар»/. Бахшида ба Соли ҷавонон дар Донишгоҳи техникии Тоҷикистон ба номи академик М. Осимӣ, мулоқоти намояндагони Кумитаи ҷавонон, варзиш ва сайёҳӣ, Кумитаи кор бо занон ва оила, Кумитаи оид ба корҳои дин, танзими анъана ва ҷашну маросимҳои миллӣ ва Маркази ҷумҳуриявии ташаккули тарзи ҳаёти солим бо донишҷӯён баргузор гардид. Дар ин бора аз Кумитаи ҷавонон, варзиш ва сайёҳӣ ба АМИТ «Ховар» хабар доданд.
Дар ҳамоиши мазкур Шоҳзод Раҳимов, сардори Раёсати кор бо ҷавонони Кумитаи ҷавонон, варзиш ва сайёҳӣ сухан карда, таъкид намуд, ки ҷавонон неруи созанда ва пешбарандаи ҳар қавму миллат мебошанд. Аз ин рӯ ҷавононро мебояд баҳри пешбурди тамоми соҳаҳои кишвар камари ҳиммат банданд ва пайваста баҳри ин талош намоянд.
Инчунин дар ҳамоиш зикр гардид, ки дар раванди ҷаҳонишавӣ ҷавонон бояд бо донишҳои фанниву техникӣ пурра муҷаҳҳаз бошанд, то дар ин раванд тавонанд обрӯю эътибори кишвар ва миллати худро дар арсаи ҷаҳонӣ боло бароранд.
Дар фарҷом байни донишҷӯён ва меҳмонон суҳбати озод ва суолу ҷавоб сурат гирифт.