Иштироки ҳайати Тоҷикистон дар ҷаласаи Шӯрои вазирони корҳои хориҷии давлатҳои аъзои СҲШ дар Остона

ДУШАНБЕ, 21.04.2017 /АМИТ «Ховар»/. 21 апрели соли 2017 ҳайати Ҷумҳурии Тоҷикистон таҳти роҳбарии Вазири корҳои хориҷии Ҷумҳурии Тоҷикистон Сироҷидин Аслов дар ҷаласаи Шӯрои вазирони корҳои хориҷии давлатҳои аъзои Созмони ҳамкории Шанхай иштирок кард. Дар ин бора ба АМИТ «Ховар» аз Вазорати корҳои хориҷии Тоҷикистон хабар доданд.
Зимни кори ҷаласа оид ба масоили муҳими минтақавию байналмилалӣ табодули афкори амиқ сурат гирифт.
Вазирони корҳои хориҷӣ теъдоди санадҳои ба баррасии ҷаласаи дарпешистодаи Шӯрои сарони давлатҳои узви СҲШ пешниҳодшавандаро мавриди муҳокима қарор доданд. Аз ҷумла, масъалаҳои марбут ба пайвастани Ҷумҳурии Ҳиндустон ва Ҷумҳурии Исломии Покистон ба Созмони ҳамкории Шанхай баррасӣ гардиданд.
Вазирони корҳои хориҷӣ оид ба тавсеаи минбаъдаи ҳамкорӣ дар самти муқовимат ба хатару чолишҳои муосир, пеш аз ҳама, бар зидди терроризм, ифротгароӣ, ҷинояткории муташаккилонаи фаромиллӣ ва гардиши ғайриқонунии маводи нашъадор, инчунин таҳкими амнияти байналмилалии иттилоот ва вокуниш ба ҳолатҳои фавқулода ибрози назар карданд.
Сарони ҳайатҳо ҳамчунин изҳор карданд, ки таҳкими равобит дар соҳаҳои тандурустӣ, фарҳанг, ҳифзи муҳити зист, илму техника, варзиш ва сайёҳӣ аз омилҳои муҳими рушди бомуваффақияти ҳамкории давлатҳои аъзои СҲШ маҳсуб меёбад.
Оид ба ҳамаи масъалаҳои зимни ҷаласа баррасишуда қарорҳои дахлдор қабул гардиданд.
Дар ҳошияи ҷаласаи Шӯрои вазирони корҳои хориҷии СҲШ дар Остона мулоқотҳои дуҷонибаи Вазири корҳои хориҷии Ҷумҳурии Тоҷикистон С. Аслов бо роҳбарони мақомоти сиёсати хориҷии Ҷумҳурии Қазоқистон ва Ҷумҳурии Мардумии Чин баргузор шуд.