Коркарди механизм ва технологияҳои инноватсионӣ баҳсҳои доманадори илмиро талаб менамояд

ДУШАНБЕ, 04.04.2017 /АМИТ «Ховар»/. Таҳти унвони «Рушди хизматрасониҳои молиявӣ дар шароити ҳамгироии хоҷагии ҷаҳонӣ» дар Донишкадаи соҳибкорӣ ва хизмати Вазорати саноат ва технологияҳои нави Ҷумҳурии Тоҷикистон Конфронси ҷумҳуриявии илмӣ-назариявӣ доир гардид. Дар ин бора аз Донишгоҳи мазкур хабар доданд.
Дар конфронс ректори донишкада, профессор Диловар Қодирзода гуфт, ки масъалаи таҳкими пайвастаи хизматрасониҳои молиявӣ ба аҳолӣ ва субъектҳои хоҷагидорӣ дар шароити ҳамгироии хоҷагии ҷаҳонӣ аз муҳимтаринҳо буда, коркарди механизмҳо ва технологияҳои инноватсионӣ дар ин самт баҳсҳои доманадори илмиро талаб менамояд.
Зикр шуд, ки ин ҳамоиши илмӣ, ки бо ташаббуси раёсати Донишкадаи соҳибкорӣ ва хизмат бо ҷалби ҷамъи олимону муҳаққиқон ва коршиносон доир мегардад, қадами муҳиме дар самти рушди минбаъдаи хизматрасониҳои молиявӣ дар шароити ҳамгироии хоҷагии ҷаҳонӣ хоҳад буд.
Иштирокчиён атрофи масоили муаммоҳои рушди хизматрасонии молиявӣ дар шароити ҳамгироии иқтисодии ҷаҳонӣ, дурнамои рушди низоми бонкӣ дар шароити ҳамгироии иқтисодии ҷаҳонӣ, танзими муносибатҳои асъорӣ ҳамчун омили рушди устувори иқтисодиёти миллӣ, воситаҳои муосири сиёсати молиявию қарзии Бонки миллии Тоҷикистон ва амсоли инҳо баҳсҳои доманадори илмӣ намуданд.