Нахустин гурӯҳи ҷавонони вилояти Хатлон ба сафи Қувваҳои Мусаллаҳи Ҷумҳурии Тоҷикистон сафарбар гардид

ДУШАНБЕ, 04.04.2017 /АМИТ «Ховар»/. Дар доираи маъракаи даъвати баҳории ҷавонон ба сафи Қувваҳои Мусаллаҳи Ҷумҳурии Тоҷикистон нахустин гурӯҳи ҷавонони вилояти Хатлон, ки синнашон ба хизмати ҳарбӣ расидааст (1990-1999), сафарбар карда шуданд.
Давлатшоҳ Гулмаҳмадзода, раиси вилояти Хатлон зимни ҳамоиш иброз дошт, ки бо дастгирии пайвастаи Ҳукумати Ҷумҳурии Тоҷикистон, бахусус Асосгузори сулҳу ваҳдати миллӣ, Пешвои миллат, Президенти кишвар муҳтарам Эмомалӣ Раҳмон дар ҳамаи ҷузъу томҳои низомии Қувваҳои Мусаллаҳи мамлакат тамоми шароит барои адои хизмати ҳарбии ҷавонон муҳайё карда шудааст. «Хизмат ба Ватан шарафи бузург ва дар айни замон вазифаи муқаддаси ҳар як ҷавон мебошад. Ҳар як хизматчии ҳарбӣ бояд хуб дарк намояд, ки ватандӯстӣ- ин арзи садоқат ба Ватан-Модар ва халқу давлати соҳибистиқлоли худ буда, дар пос доштани арзишҳои миллӣ ва аз тамоми манфиатҳо боло гузоштани манфиати давлату халқ зоҳир мегардад»,-иброз дошт Давлатшоҳ Гулмаҳмадзода.
Ҳамчунин дар ҳамоиш аз наваскарон даъват ба амал оварда шуд, ки дар баробари обутоби бадан дар қисмҳои ҳарбӣ, ба омӯхтани донишҳои замонавии сиёсӣ ва низомӣ машғул шуда, мутахассиси варзида гарданд.