Ба директору мудирони муассисаҳои таълимӣ барои гузаронидани «Занги камолот», «Иди Алифбо» ва «Хайр, боғча!» муҷозоти меҳнатӣ пешбинӣ мегардад

ДУШАНБЕ, 04.05.2017 /АМИТ «Ховар»/. Вазорати маориф ва илми Ҷумҳурии Тоҷикистон бо қабули қарор «Занги камолот», «Иди Алифбо» ва «Хайр, боғча!»-ро дар муассисаҳои таълимӣ манъ намуд. Қарори мазкур ба татбиқи амалии Қонуни ҶТ «Дар бораи танзими анъана ва ҷашну маросимҳо дар Ҷумҳурии Тоҷикистон» нигаронида шудааст.
Тавре аз хадамоти матбуоти вазорат хабар доданд, дар сурати риоя нашудани қарори мазкур аз ҷониби роҳбарони муассисаҳои таълимӣ (новобаста аз шакли моликият ва тобеияташон) ё омўзгорону мураббияҳо тибқи Кодекси меҳнати Ҷумҳурии Тоҷикистон ба онҳо муҷозоти меҳнатӣ пешбинӣ мегардад.
Сардорони раёсатҳои маорифи Вилояти Мухтори Кўҳистони Бадахшон, вилоятҳои Суғду Хатлон, шаҳри Душанбе, мудирони шуъбаҳои маорифи шаҳру ноҳияҳои тобеи ҷумҳурӣ, роҳбарони муассисаҳои таълимии ҷумҳуриявӣ вазифадор карда шуданд, ки иҷрои қарори мазкурро таъмин ва риояи онро зери назорати ҷиддӣ гиранд.