Баъд аз насби камераҳои назоратӣ садамаҳои нақлиётӣ то 20 фоиз кам шудаанд

ДУШАНБЕ, 12.05.2017 /АМИТ «Ховар»/.  Дар Муассисаи давлатии Маҷмааи тандурустии «Истиқлол» бахшида ба «Ҳафтаи чоруми глобалии бехатарии ҳаракати нақлиёт» ҷаласа  баргузор гардид. Дар ин бора аз Вазорати тандурустӣ ва ҳифзи иҷтимоии аҳолии Ҷумҳурии Тоҷикистон хабар доданд.

Дар ҷаласа намояндагони Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, Раёсати Бозрасии давлатии автомобилӣ ва Ташкилоти умумиҷаҳонии тандурустӣ иштирок намуданд.

Сармутахассиси Вазорати тандурустӣ ва ҳифзи иҷтимоии аҳолӣ оид ба осебшиносӣ-радодӣ, профессор Абдувалӣ Раззоқов дар  ҷамъомад вобаста ба оқибатҳои садамаҳои нақлиётӣ сухан гуфта, иброз дошт, ки ҳар сол дар миқёси ҷаҳон 5 миллион нафар дар натиҷаи осебҳо мефавтанд, ки аз ин 1 миллион ба садамаҳои нақлиётӣ рост меояд, яъне дар ҳар шаш сония як кас вафот мекунад.

«Дар ҷумҳурӣ ҳамасола то 200 ҳазор нафар осебҳои умумӣ мебардоранд, ки аз он 420-490 нафарашон мефавтанд. Ҳамчунин дар қиёс бо кишварҳои пешрафта, ки рақами ягонаи қабули ҳодисаҳои фавқулодаро доранд, бигзор дар Тоҷикистон низ чунин рақам ҷорӣ карда шавад»,- баён дошт А. Раззоқов.

Дар ҷаласа зикр шуд, ки  «баъд аз насби камераҳои назоратӣ садамаҳои нақлиётӣ то 20 фоиз кам шудаанд. Дар соли 2016 бар асари 1326 садамаи нақлиётӣ 427 нафар шаҳрвандон ба ҳалокат расида, 1419 нафар ҷароҳат гирифтаанд. Нисбат ба соли 2015 шумораи садамаҳо 149 адад (10,1%), ҳалокшудагон 22 нафар (ё 4,9%) ва маҷрӯҳшудагон 157 нафар (10,0%) кам шудааст».