Дар ҷамоати Навободи ноҳияи Шуғнон ярмаркаи ҷойҳои корӣ баргузор шуд

ХОРУҒ, 18.05.2017 /АМИТ «Ховар»/. Бо иқдоми кормандони шуъбаи меҳнат ва шуғли аҳолии ноҳияи Шуғнон, шуъбаи Хадамоти муҳоҷирати меҳнатӣ, филиали Муассисаи давлатии маркази таълими калонсолон дар ҷамоати Навобод ярмаркаи ҷойҳои корӣ баргузор шуд.  Ба гуфтаи сардори шуъбаи меҳнат ва шуғли аҳолии ноҳияи мазкур Бунафша  Мамадбекова, дар ярмарка барои бекорон 70 ҷои корӣ ва курсҳои такмили касб пешниҳод шуд ва 40 нафар аз сокинони ноҳия худро номнавис намуданд. Дар ин ярмарка ҳамчунин намояндагони корхонаҳои хурди ҳунарҳои дастӣ бо мақсади ҷалби сокинони бекор ба омӯзиши ҳунарҳои дастӣ, аз қабили бофандагию ресандагӣ, кандакорию қаннодӣ ширкат доштанд. 20 нафар аз иштирокчиёни ярмарка барои ширкат дар ин омӯзишҳо дархост пешниҳод карданд.

Дар баробари пешниҳоди ҷойҳои корӣ, ҳамчунин иддае аз муҳоҷирони меҳнатӣ, ки бо сабабҳои гуногун аз  Федератсияи Россия ихроҷ шудаанд, ба рӯйхати авфшудагон ворид гардида, иҷозати сафар ба ин кишварро дарёфт намуданд.