Дар филиали Донишгоҳи давлатии Москва дар шаҳри Душанбе Рӯзи Ғалаба таҷлил шуд

ДУШАНБЕ, 05. 05.2017 /АМИТ «Ховар»/. 5 майи соли равон дар Раёсати филиали Донишгоҳи давлатии Москва ба номи М.В. Ломоносов дар шаҳри Душанбе бахшида ба 72-солагии Рӯзи Ғалаба дар Ҷанги дуюми ҷаҳон ҳамоиши фарҳангӣ доир шуд.
Дар ҳамоиши мазкур собиқадорони меҳнат ва иштирокдорони Ҷанги дуюми ҷаҳонӣ иштирок намуда, аз рӯзҳои мудҳиши ҷанг ба ҷавонон нақл намуданд. Зикр гардид, ки аз Ҷумҳурии Тоҷикистон садҳо ҳазор ҷавонмардон ба набардҳои хунин рафта, корнамоиҳо нишон доданд.
«Қисми зиёди фиристодагони Тоҷикистон дар набардҳои шадиди ҷанг ба хотири иҷро кардани қарзи фарзандии хеш ҳалок шуданд, ки номи неки онҳо дар саҳифаҳои таърих абадан сабт гардидааст.
Ҳарчанд ки майдони ҷанг аз Тоҷикистон хеле дур буд, вале таъсири он дар ҳамаи гӯшаву канори он ва ҳар як хонавода эҳсос мегардид»,- гуфта шуд дар ҳамоиш.
Дар маҳфил оркестри дивизияи ҳарбии 201-уми Русия дар якҷоягӣ бо ханандагони мактаби миёнаи №8 ва донишҷӯёни филиали Донишгоҳи давлатии Москва ба номи М.В. Ломоносов дар шаҳри Душанбе ҳунарнамоӣ намуданд.