Дар маҷмааи «Динамо» мусобиқаи байналмилалӣ оид ба гӯштини тарзи юнонию румӣ оғоз шуд

ДУШАНБЕ, 18.05.2017. /АМИТ «Ховар»/. Дирӯз дар Маҷмааи варзишии Шӯрои ҷумҳуриявии «Динамо»-и Вазорати корҳои дохилии Ҷумҳурии Тоҷикистон мусобиқаи байналмилалӣ оид ба гӯштини тарзи юнонию румӣ оғоз гардид. Дар ин бора аз Вазорати корҳои дохилӣ хабар доданд.

Миёни варзишгарони навраси Шӯрои байналмилалии ҳамоҳангсозии ҷамъиятҳои «Динамо» таҳти шиори «Ҷавонон – ояндасози Ватан», ки тайи ду рӯз идома меёбад, ҷиҳати иштирок беш аз 400 нафар варзишгарони наврасу ҷавони мактабҳои варзишии ҷумҳуриҳои Қазоқистон, Қирғизистон ва аксари минтақаҳои Тоҷикистон- вилоятҳои Суғду Хатлон, шаҳри Душанбе ва шаҳру ноҳияҳои тобеи ҷумҳурӣ ҷамъ омаданд.

Мусобиқаи мазкур ба Соли ҷавонон бахшида шуда, варзишгарони наврасу ҷавон қувва ва маҳорату тавоноии худро бори дигар дар назди мухлисону тамошобинони зиёд нишон доданд. Дар мусобиқа аз ҷониби Шӯрои ҷумҳуриявии «Динамо» 43 дастпарвари он ба майдони қувваозмоӣ баромаданд.

Дар мусобиқа муовини аввали Раиси Шӯрои ҷумҳуриявии «Динамо»-и Вазорати корҳои дохилии ҶТ Аслиддин Шоҳиён намояндагони ҷумҳуриҳои Қазоқистону Қирғизистонро ба Тоҷикистон хайрамақдам гуфта, ба онҳо барои ҳамкорӣ дар соҳаи варзиш ва муносибатҳои дӯстона миннатдорӣ изҳор кард.