Дар моҳи Рамазон бозорҳои шаҳри Душанбе бо молу маҳсулоти арзон ғанӣ гардонида мешаванд
![](https://khovar.tj/wp-content/uploads/2017/05/Rynok-Dushanbe-2.jpg)
ДУШАНБЕ, 20.05.2017./АМИТ «Ховар»/. Ба хотири дар моҳи шарифи Рамазон боло нарафтани нархи маҳсулот ва таъмини бозорҳо бо маҳсулоти нисбатан арзони мавриди ниёзи аввал роҳбарони КВД «Оид ба истеҳсол, харид, захира ва фурӯши маҳсулоти мавриди ниёзи аввал дар шаҳри Душанбе», «Бозори Деҳқон», «Бозори Шоҳмансур», «Бозори Саховат» ва дигар идораю муассисаҳои дахлдор вазифадоранд, ки тӯли ин моҳ барои соҳибкорону тоҷирон, Агентии захираҳои моддии давлатии назди Ҳукумати ҶТ ва иттифоқи «Тоҷикматлубот», ки ба бозорҳо маҳсулот мебароранд, шароит фароҳам оранд ва онҳоро аз пардохти маблағҳои яквақта озод намоянд. Дар ин бора қарори Раиси шаҳри Душанбе Рустами Эмомалӣ ба имзо расид.
Тибқи қарори мазкур дар моҳи шарифи Рамазон дар таваққуфгоҳи назди КВД «Бозори меҳргон», майдончаи назди бозори «Қарияи Боло», майдончаи назди Кумитаи меъморӣ ва сохтмон воқеъ дар кӯчаи Ҳусейнзода-36, қисмати ҷанубии Боғи «Дӯстии халқҳо» аз ҷониби кишоварзони минтақаҳои гуногуни мамлакат ярмарка-фурӯши молу маҳсулот доир карда мешавад. Илова бар ин, маъмурияти бозорҳо вазифадор шуданд, ки бевосита бо истифода аз маблағҳои молиявии худӣ, ҳамарӯза дар моҳи шарифи Рамазон мустақиман харид, ворид, захира ва фурӯши маҳсулоти аввалияро дар бозорҳо таъмин кунанд.