Душанбе: масъулин сокинони пойтахтро ба камхарҷ гузаронидани ҷашну маросимҳо даъват менамоянд

ДУШАНБЕ, 16.05.2017. /АМИТ Ховар/. Мақомоти иҷроияи ҳокимияти давлатии шаҳри Душанбе  ҷиҳати риоя гардидани  талаботи Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» тадбирҳои судманд меандешад.

Бино ба иттиллои  Раёсати  иттилоот ва робитаҳои хориҷии дастгоҳи Раиси шаҳри Душанбе  дар пойтахт барои пешгирии қонуншиканиҳо 1086 комиссияи ҷамъиятӣ дар ҳамоҳангӣ бо 5 комиссияи доимӣ  фаъолият доранд.

Дар давоми чор моҳи соли равон  аз тарафи шуъба оид ба корҳои дин, танзими анъана ва ҷашну маросимҳои миллии дастгоҳи Раиси шаҳри Душанбе барои риоя накардани қонуни мазкур  нисбат ба 30 қонуншиканӣ санади ҳуқуқвайронкунӣ тартиб дода шуда, ба суд ирсол гардид.

Аз  вайрокунандагони қонун  ба маблағи 85 ҳазору 700 сомонӣ ҷарима ситонда, ба буҷаи давлат ворид карда шуд. Айни замон 31 ҳолати ҳуқуқвайронкунӣ мавриди омӯзиш қарор гирифта, баъди баррасии ҳамаҷониба ба суд ирсол хоҳанд шуд. Зимни гузарондани санҷишҳои муштарак 61 адад қонуншиканӣ, аз ҷумла дар ноҳияи Исмоили Сомонӣ  15 адад, Шоҳмансур  10 адад, Фирдавсӣ  13 адад, Сино — 15 адад ва шуъбаи шаҳрӣ  — 8 адад ошкор гардиданд.

Дар ин давра комиссияҳои доимии мақомоти иҷроияи ҳокимияти давлатии шаҳру ноҳияҳои пойтахт барои камхарҷ доир намудани ҷашну маросимҳо, пешгирии қонуншиканиҳо ва таблиғи корҳои хайриявӣ, дар маҷмӯъ 119 суҳбату вохӯрӣ доир намуданд. Дар вохӯриҳо  масъулин   моҳияти қонуни мазкурро ба шаҳрвандон фаҳмонида, аз онҳо риояи қатъии онро  талаб намуданд.

Дар давраи зикршуда дар ҳамкорӣ бо кормандони мақомоти ҳифзи ҳуқуқ ва Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон 320 санҷиши муштарак гузаронда шудаанд.