Хуҷанд: баррасии натиҷаҳои амалиёти профилактикӣ ва маърифатии «Маданияти шаҳрдорӣ»

ДУШАНБЕ, 27.05.2017. /АМИТ«Ховар»/. Роҳбарияти Раёсати Вазорати корҳои дохилӣ дар вилояти Суғд ҷиҳати дар амал татбиқ намудани дастуру супоришҳои Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба пурзӯр намудани корҳои фаҳмондадиҳӣ ва пешгирикунанда ва дар ин замина коҳиш додани сатҳи ҷинояткорӣ силсилаи вохӯриҳоро бо фаъолони ҷомеаи шаҳрвандӣ ва намояндагони мақомотҳои маҳаллии ҳокимияти давлатӣ дар шаҳру ноҳияҳои вилояти Суғд баргузор менамояд.
Тавре аз Вазорати корҳои дохилии Ҷумҳурии Тоҷикистон хабар доданд, тибқи нақша ин маротиба вохӯрӣ ва мулоқоти озоду ошкорои сардори Раёсати ВКД дар вилояти Суғд генерал-майори милитсия Шариф Назарзода дар толори «Кохи Рӯдакӣ» бо фаъолон ва ҷомеаи шаҳрвандии шаҳри Хуҷанд баргузор гардид.
Дар оғози чорабинӣ филми мустанади «Ворисони Аҳриман», ки аз ҷониби Маркази матбуоти РВКД дар вилояти Суғд омода шуда, аз ҳаёти талхи ҷавонони тоҷик, ки баъди пайвастан ба ҳизбу ҳаракатҳои иртиҷоии ифротгаро дар муқовиматҳои мусаллаҳонаи давлатҳои хориҷӣ иштирок доранд, ҳамчунин аз ҷараёни тафтиши парвандаҳоии ҷиноятии вобаста ба ҷиноятҳои хусусияти террористиву экстремистидошта ва бегонапарастии аъзоёни оилаи ин нафарон қисса мекунад, ба намоиш гузошта шуд.
Сипас Шариф Назарзода дар маърӯзаи таҳлилии хеш бо истифода аз фото-слайдҳо ва видео-слайдҳо мушкилоти ҷойдоштаи шаҳри Хуҷандро мавриди баррасӣ ва чораандешӣ қарор дод. Аз ҷумла зикр намуд, ки новобаста аз кӯшишу талошҳои масъулини мақомоти корҳои дохилӣ баҳри ҳамоҳангсозии фаъолияти дастаҷамъонаи бахшу воҳидҳои марбутаи мақомоти иҷроияи ҳокимияти давлатӣ, аҳли зиё, уламои дин ва фаъолони маҳал баҳри коҳиш додани сатҳи ҷинояткорӣ то имрӯз дар шаҳри Хуҷанд ҳолатҳои истиробангезе ҷой доранд, ки ҳеҷ яке аз моро бетараф гузошта наметавонад.
Мавсуф иброз намуд, ки «маҳз дар сатҳи баланди касбӣ ва бо сифати баланди хизматӣ ташкил намудани амалиёти профилактикиву маърифатии «Маданияти шаҳрдорӣ» буд, ки давоми 4 моҳи соли ҷорӣ вазъи ҷинояткорӣ тамоюли пастравӣ дошта, тамоми ҷиноятҳои вазнин ва махсусан вазнин аз қабили одамкушиву ғоратгарӣ, роҳзанӣ ва ҳодисаҳои худкушӣ ва суиқасд ба он нисбати ҳамин давраи соли гузашта хеле кам гардидааст».