Истеъмолкунандагон мебояд аз ҳуқуқҳои худ ҳимоя кунанд

ДУШАНБЕ, 24.05.2017/АМИТ «Ховар»/. Фаъолияти марказҳои  машваратӣ, ки дар назди мақомоти иҷроияи  ҳокимияти давлатии шаҳру ноҳияҳои кишвар амал менамоянд, дар ҷаласае, ки 24 май таҳти раёсати муовини сардори Хадамоти зиддинҳисории назди Ҳукумати Ҷумҳурии Тоҷикистон  Абдусамад Саидмуродзода доир гардид, баррасӣ шуд.

Зикр гардид, ки бо мақсади баланд бардоштани маърифати ҳуқуқии истеъмолкунандагон  дар доираи татбиқи Қонуни  Ҷумҳурии Тоҷикистон «Дар бораи ҳимояи ҳуқуқи истеъмолкунандагон», аз ҷониби Хадамоти  зиддиинҳисории назди Ҳукумати Ҷумҳурии Тоҷикистон  ва дастгирии Ҳукумати  Ҷумҳурии Тоҷикистон  шурӯъ аз соли 2015 дар 64 шаҳру ноҳияҳои ҷумҳурӣ марказҳои машваратӣ таъсис  дода шуданд. Самти асосии марказҳои машваратӣ  ба кам кардани санҷишҳо, баланд бардоштани маърифати ҳуқуқӣ ва баррасии арзу муроҷиати истеъмолкунандагон, инчунин  ба танзим даровардани нархи молу маҳсулот дар бозори истеъмолӣ нигаронида шудааст. Аз 64 маркази  машваратӣ 25-тоаш дар вилояти Хатлон, 18-то дар вилояти Суғд, 13 адад дар ноҳияҳои тобеи марка, 7-то дар Бадахшон  ва як Маркази  машваратӣ дар Душанбе  фаъолият менамоянд.

Дар ҷаласа муовини сардори   Хадамоти  зиддинҳисории назди Ҳукумати Ҷумҳурии  Тоҷикистон Абдусамад Саидмуродзода доир ба роҳҳои таҳкими фаъолияти марказҳои  машваратӣ дар шаҳру навоҳии кишвар, баланд бардоштани фарҳанги  ҳуқуқии истеъмолкунандагон, ба роҳ мондани ҳамкории мутақобилан судманди марказҳои  машваратӣ бо сохторҳои марбута ҷиҳати   ҳимояи ҳуқуқи истеъмолкунандагон ибрози назар кард. Мавсуф афзуд, ки имрӯз вақти он расидааст, ки маърифати ҳуқуқии истеъмолкунандагон боло бурда шавад. Мушоҳидаҳо бозгӯи онанд, ки истеъмолкунандагон дар аксар маврид аз ҳуқуқҳои худ дифоъ намекунанд. Масалан дар воситаҳои нақлиёти мусофиркашонии пойтахт дар аксар маврид истеъмолкунандагон 40 дирами бақияи роҳкирои худро аз ронандагон талаб наменамоянд, ё ҳангоми харидории дору аз дорухонаҳо, муроҷиат ба духтурон  нархнома намепурсанд,  ки ин раванд аз паст будани сатҳи маърифати ҳуқуқии  истеъмолкунандагон  шаҳодат медиҳад. Дар ин росто таъкид шуд, ки  бояд фаъолияти марказҳои машваратӣ дар шаҳру ноҳияҳои кишвар ҷоннок карда шуда,  барои фаъолияти густурдаи онҳо шароити зарурӣ, хусусан утоқҳои корӣ, телефонҳои боварӣ фароҳам оварда шаванд. Инчунин баррасии арзу муроҷиати истеъмолкунандагон дар сатҳи  зарурӣ ба роҳ монда шуда,  аз поймол гардидани ҳуқуқҳои онҳо  ҷилавгирӣ карда шавад. Зеро роҳи ҳалли масъала танҳо дар бастани ҷарима нест.

Дар ҷаласа ҳамзамон Акбар Хоҷаев, сардори Раёсати ҳифзи ҳуқуқи истеъмолкунандагони Хадамоти зиддинҳисории назди Ҳукумати Ҷумҳурии Тоҷикистон,  инчунин масъулони марказҳои машваратие, ки дар назди мақомоти иҷроияи ҳокимияти давлатии шаҳру навоҳии тобеи марказ фаъолият доранд,  доир ба роҳҳои баланд бардоштани маърифати ҳуқуқии истеъмолкунандагон, ҷилавгирӣ аз баланд гардидани нархи маҳсулот дар бозорҳо, хусусан дар моҳи Рамазон, такмили фаъолияти марказҳои  машваратӣ  ва дигар масъалаҳои марбут ба танзими нарх дар бозори истеъмолии кишвар ибрози назар намуда, пешниҳодҳои судманд баён карданд.

Таъкид шуд, ки дари марказҳои машваратӣ бояд ҳамеша ба рӯи истеъмолкунандагон боз бошад.

Марзия САИДЗОДА