Сокини деҳаи Деваштичи шаҳри Панҷакент бо истифода аз панелҳои офтобӣ чорворо бо хӯроки сабз таъмин менамояд

ДУШАНБЕ, 03.12.2025 /АМИТ «Ховар»/. Сокини деҳаи Деваштичи деҳоти Халифа Ҳасани шаҳри Панҷакент Шоҳрух Бобоев бо истифодаи панелҳои офтобӣ чорворо бо хӯроки сабз таъмин менамояд.

Тавре АМИТ «Ховар» бо истинод ба Мақомоти иҷроияи ҳокимияти давлатии шаҳри Панҷакент хабар медиҳад, соҳибкор Шоҳрух Бобоев дар фермаи шахсиаш беш аз сад сар гӯсфанд, ки аксараш зоти ҳисорӣ аст, парвариш намуда, дар оғози фасли зимистон ба онҳо хӯроки сабз медиҳад. Ӯ бо насби панели офтобӣ бо иқтидори 16 киловатт барои парвариши хӯроки сабз гармхона бунёд намудааст.

Дар гармхона дони ҷав ва дигар зироати донагиро тибқи технологияи махсус сабзонида, баъдан ба гӯсфандон медиҳанд.

Бояд гуфт, ки ҳамасола дар давраи тирамоҳу зимистон норасоии неруи барқ ба назар мерасад. Панелҳои офтобӣ — дастгоҳҳое мебошанд, ки энергияи офтобро ба неруи барқ табдил медиҳанд. Имрӯзҳо ин панелҳо бештар маъмуланд, зеро манбаи тоза ва дастрас барои энергия мебошанд. Ба андешаи коршиносон, бо дастрас шудани таҷҳизоти офтобӣ зиндагии сокинони мамлакат беҳтар гардида, он дар 3-4 сол хароҷоташро мебарорад ва ба мардум ба муддати тӯлонӣ хизмат мекунад.

АКС: Мақомоти иҷроияи ҳокимияти давлатии шаҳри Панҷакент