Марҳилаи ниҳоии мусобиқаҳои ҷумҳуриявӣ байни донишҷӯён оғоз гардид

ДУШАНБЕ, 09.05.2017 /АМИТ «Ховар»/. Марҳилаи ниҳоии мусобиқаҳои ҷумҳуриявӣ байни донишҷӯёни муассисаҳои таҳсилоти олии касбии Ҷумҳурии Тоҷикистон оғоз гардид, ки то 21 майи соли равон идома хоҳад ёфт.
Тавре аз Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон хабар доданд, мусобиқаҳои мазкур бо ташаббуси Кумитаи ҷавонон, варзиш ва сайёҳӣ дар якҷоягӣ бо Вазорати маориф ва илми Ҷумҳурии Тоҷикистон ҳамасола байни донишҷӯёни муассисаҳои таҳсилоти олии касбии ҷумҳурӣ дар се марҳила баргузор карда мешавад.
Тибқи ҷадвали тасдиқгардида иштирокчиён аз намудҳои бокс, волейбол (байни мардон ва бонувон), гӯштини миллӣ, дзюдо, тарзи озод ва варзиши сабук байни ҳам рақобат менамоянд.
Имсол шаҳрҳои Душанбе, Хуҷанд, Кӯрғонтеппа ва Кӯлоб макони баргузории рақобатҳо интихоб шудаанд.