Ифтитоҳи низоми нави ҷамъоварии лоиҳаҳо дар соҳаи инноватсия ва ихтироъкорӣ

ДУШАНБЕ, 20.06.2017 /АМИТ «Ховар»/. Дар асоси дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паёми худ ба Маҷлиси Олии кишвар (декабри соли 2016) бо мақсади  дарёфти афроди лаёқатманд ва боистеъдод дар самти навоварию ихтироъкорӣ, алалхусус наврасону ҷавонон, дастгирии онҳо ва тарғибу ташвиқи соҳа дар байни аҳолӣ бори аввал дар ҷумҳурӣ бо ибтикори Муассисаи давлатии «Маркази миллии патенту иттилоот»-и Вазорати рушди иқтисод ва савдои Ҷумҳурии Тоҷикистон низоми нави пешниҳоди лоиҳа ва навовариҳои характери ихтироъкорӣ ва инноватсионидошта  (тариқи электронӣ)  дар сомонаҳои  интернетии www.tajpatent.tj ва www.innovation.tj роҳандозӣ карда шуд.

Тавре аз Муассисаи давлатии «Маркази миллии патенту иттилоот» хабар доданд, мақсад аз ташкил намудани чунин тарзи коргузорӣ боз ҳам осон ва камхарҷ пешниҳод намудани лоиҳа ва навовариҳои инноватсионӣ аз тамоми минтақаҳои ҷумҳурӣ  мебошад. Ҳар як шахс новобаста аз синну сол ва соҳаи фаъолият  метавонад ба сомонаҳои зикршуда ворид гардида, лоиҳа ва навоварии худро ба унвонии Муассиса пешниҳод намояд.

Мутахассисони Муассиса лоиҳа ва навовариҳои инноватсиониро мавриди баррасӣ ва омӯзиш қарор дода, ба шаҳрвандон дар такмил ва коркард намудани лоиҳаҳо ва навовариҳо кумаки худро мерасонанд.

Он лоиҳаҳо ва ғояҳои нави инноватсионӣ, ки муфид ва хусусияти дар саноат татбиқшавандагӣ доранд, аз ҷониби Муассиса ба вазорату кумитаҳо ва ширкату корхонаҳои дахлдор бо мақсади ҷалби сармоягузорӣ  ва дар амал татбиқ намудан пешниҳод карда мешаванд.

Ҳамчунин аз ҷониби Муассиса  лоиҳаҳо ва ғояҳои нави инноватсионии беҳтарин дар дохил ва беруни кишвар ба ҷомеа муаррифӣ ва қадрдонӣ карда мешаванд.

Мавриди зикр аст, ки дар ин замина манбаи ягонаи ҷумҳуриявӣ оид ба наврасон ва ҷавонони боистеъдод ва эҷодкор дар самти навоварӣ ва ихтироъкорӣ таъсис дода мешавад.

Пешниҳоди лоиҳа ва навовариҳои инноватсионӣ тариқи электронӣ дар сомонаҳои  интернетии www.tajpatent.tj ва www.innovation.tj пурра ба таври ройгон ба роҳ монда шудаанд.