Йога-таҷассумгари ягонагии рӯҳу тан ва ваҳдати инсоният: дар Душанбе 3-юмин Рӯзи байналмилалии Йога таҷлил гардид

ДУШАНБЕ, 17.06.2017 /АМИТ«Ховар»/. Ҳамасола дар ҷаҳон 21 июн ҳамчун  Рӯзи байналмилалии Йога ҷашн гирифта мешавад. Таҷлил намудани ин рӯз 12 декабри соли 2014 дар ҷаласаи 69-уми Маҷмааи умумии Созмони Милали Муттаҳид аз ҷониби Сарвазири Ҳиндустон Нарендра Модӣ ба миён омада, бо ҷонибдории 177 кишвари олам қабул гардидааст.

Ба ин муносибат имрӯз дар шаҳри Душанбе  3-юмин Рӯзи байналмилалии Йога  таҷлил карда шуд, ки дар он Сафири Фавқулода ва Мухтори Ҳиндустон дар Ҷумҳурии Тоҷикистон, намояндагони корпусҳои дипломатии муқими Душанбе ва вазорату кумитаҳои кишвар иштирок доштанд.

Тавре мухбири АМИТ «Ховар» иттилоъ медиҳад, Сафири Фавқулода ва Мухтори Ҳиндустон дар Ҷумҳурии Тоҷикистон Сомнатҳ Гҳош чунин изҳор дошт: «Ин соли сеюм аст, ки дар саросари ҷаҳон Рӯзи байналмилалии Йога ҷашн гирифта мешавад. Сол то сол ҷомеаи  ҷаҳонӣ ба Йога таваҷҷуҳи зиёд зоҳир мекунанд. Бо ин мақсад дар Сафорати Ҳиндустон дарси махсуси Йога ройгон роҳандозӣ гардидааст. Фалсафаи калимаи Йога маънои онро дорад, ки тибқи ин мафҳум тамоми оламиён ба ҳам наздиктар мешаванд. Фикр мекунам, ки ин мафҳум ба гуфтаи Шайх Саъдӣ: «Бани одам аъзои якдигаранд» алоқамандии зич дорад».

«Йога- таҷассумгари ягонагии рӯҳу тан, зеҳну рафтор ва ваҳдати инсон бо табиат мебошад. Гуфтаҳои бузургвори мо Авасто «рафтори нек, пиндори нек ва гуфтори  нек» низ ба ин фалсафа ҳамоҳанг аст. Машғулият бо Йога, ки варзиш, фалсафа ва санъатро дарбар мегирад, имкон медиҳад, то инсоният худшинос бошад, маърифати худро такмил диҳад, инчунин  бар инсонҳо, миллатҳо ва намояндагони дину мазҳабҳои мухталиф арҷ гузоранд»,- гуфт  муовини Вазири тандурустӣ ва ҳифзи иҷтимоии аҳолии Ҷумҳурии Тоҷикистон Мирҳамуддин Камолзода.