Конфронси ҷумҳуриявӣ бахшида ба 20-солагии Ваҳдати миллӣ дар Вазорати корҳои хориҷӣ

ДУШАНБЕ, 24.06.2017 /АМИТ «Ховар»/. 23 июни соли ҷорӣ бахшида ба 20-солагии ҷашни Ваҳдати миллӣ дар бинои Вазорати корҳои хориҷии Ҷумҳурии Тоҷикистон бо ибтикори Вазорат ва Академияи илмҳои Ҷумҳурии Тоҷикистон конференсияи ҷумҳуриявӣ таҳти унвони “Мавқеи сулҳу ваҳдат дар ҳамбастагии миллӣ” баргузор гардид, ки дар он намоянадагони Академия илмҳо  ва Маркази тадқиқоти стратегӣ, собиқ сафирони Ҷумҳурии Тоҷикистон дар кишварҳои хориҷӣ, коршиносони сиёсӣ, олимон ва мутахассисон иштирок намуданд.

Тавре аз Вазорати корҳои хориҷии Ҷумҳурии Тоҷикистон хабар доданд, дар конференсия нақши Асосгузори сулҳу Ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар барқарорсозии сулҳу субот дар Тоҷикистон, дар ташаккули ҳувияти миллӣ, Ваҳдати миллӣ ҳамчун омили рушди сиёсати хориҷӣ, заминаҳои маънавию фарҳангии ташаккули Ваҳдати миллӣ дар Тоҷикистон ва дигар мавзӯъҳои марбут ба ин санаи таърихӣ баррасӣ шуданд. Аз ҷумла таъкид шуд, ки яке аз муҳимтарин самараҳои Ваҳдати миллӣ ин суботи пойдор ва амнияти давомдор дар сарзамини мост.

Дар робита ба шаклгирии сиёсати хориҷӣ дар он давра табодули назар сурат гирифта, фидокориву ҷоннисориҳои Пешвои миллат дар роҳи истиқрори сулҳу ризояти миллӣ дар Тоҷикистон мавриди таъкид қарор гирифт.

Дар конференсия зикр шуд, ки пас аз барқарории сулҳу оромиш Тоҷикистон тавонист дар арсаи байналмилалӣ мавқеи худро устувор сохта, дар давоми чанд сол аз як кишвари ҷангзада ба оромтарин кишвари минтақа табдил ёбад ва Президенти мо пешниҳодкунандаву амалисозандаи чандин ташаббусҳои ҷаҳонӣ гардад. Аз ин нуқтаи назар, Ваҳдати миллӣ заминаи асосии ҳифз ва гиромидошти арзишҳо ва манфиатҳои миллӣ дониста мешавад.

Иштирокдорон Ваҳдати миллиро омили суботи ҷомеа ва нақшофарии кишвар дар арсаи байналмилалӣ хонда, ҳифзи ваҳдату якпорчагиро вазифаи ҳар фарди ҷомеа донистанд.