«Сомон Эйр» сарпарасти кулли Федератсияи футболи Тоҷикистон шуд

ДУШАНБЕ, 21.06.2017 /АМИТ «Ховар»/. Дар Душанбе маросими баимзорасонии Меморандум оид ба  ҳамкорӣ байни ширкати ҳавопаймоии «Сомон Эйр» ва Федератсияи футболи Тоҷикистон баргузор гардид. Тибқи санади мазкур, аз ин баъд ширкати ҳавопаймоии «Сомон Эйр» ҳамчун сарпарасти кулли Федератсияи футболи Тоҷикистон баромад мекунад.

Тавре ба мухбири АМИТ «Ховар» аз хадамоти матбуоти ин ширкат хабар доданд, дар маросими баимзорасӣ Директори тиҷоратии ширкати ҳавопаймоии «Сомон Эйр» Абдулқосим Валиев  зикр намуд: «Рушди варзиш барои такмили маънавӣ ва ҷисмонии ҳар як шахс ва шаҳрванд яке аз омилҳои муҳим ба ҳисоб меравад. «Сомон Эйр» дар ин самт кўшиш мекунад, ки саҳми худро гузорад. Ин иқдом на танҳо барои «Сомон Эйр» ва Федератсияи футбол, балки барои рушди соҳаи варзиш низ манфиатнок хоҳад буд».

Зикр гардид, ки   ширкати ҳавопаймоии «Сомон Эйр» борҳо дар гузаронидани чорабиниҳои варзишии сатҳи маҳаллӣ ва байналмилалӣ ҳамчун сарпараст баромад намудааст.