«Занги камолот» на танҳо дар Тоҷикистон, балки дар Қирғизистон, Ӯзбекистон ва Туркманистон низ манъ шудааст
ДУШАНБЕ, 07.06.2017 /АМИТ «Ховар»/. Имрӯз дар ҳамаи муассисаҳои таҳсилоти миёнаи умумии Тоҷикистон соли хониш ба охир мерасад. Машғулиятҳо дар ҳамаи мактабҳои кишвар аз рӯи реҷаи муқаррарӣ гузаронида мешаванд. Соли равон 124 ҳазору 44 нафар хонандагони синфҳои 11 мактабро хатм менамоянд. Илова бар ин, 161 ҳазору 400 нафар хатмкунандаи синфҳои 9 ба супоридани имтиҳонҳои давлатии хатм роҳ дода шуданд. Дар маҷмӯъ, тибқи маълумоти расмӣ, имрӯз дар мактабҳои Тоҷикистон зиёда аз 1 миллиону 837 ҳазору 762 нафар хонанда таҳсил мекунанд.
Ёдовар мешавем, ки аз соли 2013 инҷониб соли хониш дар Тоҷикистон на 25 май, балки 7 июн ба охир мерасад. Аз ҳамон сол гузаронидани ҳама гуна чорабиниҳои тантанавӣ, аз ҷумла сайругашти оммавӣ, зиёфатҳои идона дар тарабхонаҳо, ҷамъоварии маблағ барои гирифтани туҳфа ба омӯзгорон манъ мебошанд.
Тавре котиби матбуоти Вазорати маориф ва илми Ҷумҳурии Тоҷикистон Эҳсони Хушбахт ба АМИТ «Ховар» иттилоъ дод, қарор дар бораи тамдид намудани соли хониш то 7 июн ба хотири комгор шудан ба иҷрои барномаи таълимии 34-ҳафтаина қабул гардида буд. Зеро таътили зимистонаи мактаббачагон як моҳ идома меёбад.
«Қарор дар бораи манъи гузаронидани ҷамъомадҳои тантанавӣ ва зиёфатҳои идона ба хотири риояи Қонуни Ҷумҳурии Тоҷикистон «Дар бораи танзими анъана ва ҷашну маросимҳо» қабул гардид», — гуфт намояндаи вазорат.
Дар Тоҷикистон гузаронидани чорабиниҳои дилхушӣ бахшида ба хатми мактаб ва ба таври ғайриқонунӣ ҷамъоварӣ намудани маблағ расман манъ мебошад. Фармони дахлдор моҳи майи соли 2016 аз ҷониби Вазири маориф ва илми Ҷумҳурии Тоҷикистон Нуриддин Саид ба имзо расид.
Тибқи фармони вазир, дар ҳамаи муассисаҳои таҳсилоти умумии ҷумҳурӣ гузаронидани маъракаҳо бахшида ба «занги камолот» барои хатмкунандагони синфҳои 9 ва 11 манъ мебошад.
Дар Қирғизистон, Ӯзбекистон ва Туркманистон низ чунин фармон дар бораи манъи гузаронидани маъракаҳои оммавӣ бахшида ба анҷомрасии соли хониш амал мекунад. Ташкил намудани чорабиниҳо барои хатмкунандагони мактабҳо, ба роҳбарият ва омӯзгорони мактаб тақдим намудани туҳфаҳои гаронбаҳо, инчунин ҷамъоварии маблағ барои таҷлили «занги камолот» ва «шабнишинии хатмкунандагон» қатъиян манъ аст.
ДАРАХТ БИНШОН! Дар Ишкошим 300 бех ниҳоли гуногуни мевадиҳанда шинонида шуд
Дар шаҳри Бӯстон бо сокинони маҳаллаи «Ғалаба» мулоқоти судманд баргузор гардид
Ба воҳидҳои Кумитаи ҳолатҳои фавқулода ва мудофиаи граждании Тоҷикистон техникаи нав супорида шуд
Имрӯз дар Тоҷикистон ҳавои абрнок пешгӯӣ мешавад
Дар Донишгоҳи давлатии ҳуқуқ, бизнес ва сиёсати Тоҷикистон доир ба ҳифзи арзишҳои миллӣ ҳамоиш доир шуд
Дар Вашингтон дар назди мактаб тирпаронӣ ба амал омад
Гурӯҳи кории Кумитаи меъморӣ ва сохтмони Тоҷикистон дар шаҳрҳои Дубай ва Давҳа табодули таҷриба намуд
Ҳамкории байналмилалии Донишгоҳи технологии Тоҷикистон бо шарикон тақвият меёбад
Дар Кения шумораи бар асари бориши зиёд ҳалокшудагон аз 200 нафар гузашт
Маркази тадқиқоти стратегии Тоҷикистон ҳамкориро бо Пажуҳишгоҳи нидерландии «Клингендаел» тавсеа мебахшад
Имрӯз дар Тоҷикистон ҳавои тағйирёбандаи бебориш пешгӯӣ мешавад
«ДӮСТ ОЯД, ГАРМ ДАР ОҒӮШ ГИР». Ҷавонони фаъоли Тоҷикистон бо корхонаҳои саноатӣ ва мавзеъҳои фарҳангии ноҳияи Рӯдакӣ шинос гардиданд
