Дар Тоҷикистон сарпарастӣ ба барномаҳои ахбори шабакаҳои телевизион манъ карда мешавад

ДУШАНБЕ, 13.07.2017 /АМИТ «Ховар»/. Дар Ҷумҳурии Тоҷикистон кормандони ҳифзи ҳуқуқ ҳангоми гузаронидани  фаъолияти оперативӣ –ҷустуҷӯӣ ҳуқуқ доранд аз иттилооти компютерӣ истифода намоянд. Дар ин росто аъзои Маҷлиси миллӣ ворид намудани   тағйиру иловаҳо ба  Қонуни Ҷумҳурии Тоҷикистон «Дар бораи фаъолияти оперативӣ-ҷустуҷӯӣ»-ро  баррасӣ ва ҷонибдорӣ намуданд.

Аъзои Маҷлиси миллӣ ҳамзамон  ворид намудани  тағйиру иловаҳо ба Кодекси иҷрои ҷазои  ҷиноятии Ҷумҳурии Тоҷикистонро ҷонибдорӣ карданд. Раиси Кумита оид ба таъмини асосҳои конститутсионӣ, ҳуқуқу озодиҳои инсон, шаҳрванд ва қонунияти Маҷлиси миллии  Маҷлиси Олии Ҷумҳурии Тоҷикистон  Озода Раҳмон зимни  тавзеҳи масъалаи мазкур  гуфт, ки тибқи ин тағйирот мақоми прокурори нақлиёти Тоҷикистон ба прокурори вилоятҳо ва шаҳри Душанбе баробар карда мешавад.

Ҳамзамон дар ҷаласаи Парлумон  ба Кодекси ҳуқуқвайронкунии  маъмурии Ҷумҳурии Тоҷикистон  илова ворид карда шуд, ки тибқи он сарпарастӣ ба барномаҳои ахбор оид ба инъикоси воқеаҳои ҷорӣ  дар шабакаҳои телевизион манъ карда мешавад. Ҳадафи қонун пешбинӣ кардани ҷавобгарии маъмурӣ барои риоя накардани маҳдудиятҳо дар фаъолияти сарпарастӣ мебошад. Тибқи он минбаъд барои дахолат кардани сарпараст ба фаъолияти кумакгиранда, сарпарастии реклама аз ҷониби шахсоне, ки машрубот, тамоку ва маҳсулоти тамоку истеҳсол мекунанд, ҷавобгарии маъмурӣ дар намуди ҷарима муқаррар мегардад.

Ҳамзамон аъзои Маҷлиси миллӣ  ворид намудани тағйиру иловаҳо ба Қонуни Ҷумҳурии Тоҷикистон «Дар бораи милитсия»-ро ҷонибдорӣ карданд, ки  дар асоси ин тағйирот минбаъд танҳо шаҳрвандони Ҷумҳурии Тоҷикистон ҳуқуқи фаъолият дар мақомоти   милитсияро доранд.