Намоишгоҳи молу маҳсулоти ширкатҳои Ҳиндустон дар Хуҷанд

ДУШАНБЕ, 28.07.2017. /АМИТ «Ховар»/ 20 ширкати ҳиндустонӣ ду рӯз инҷониб дар бинои Театри мусиқӣ-мазҳакавии ба номи Камоли Хуҷандӣ маҳсулоти нассоҷӣ, ҷавоҳирот, маҳсулоти ороишотӣ, атриёт ва дигар молу колои худро пешкаши мардуми вилояти Суғд намудаанд.

Тавре аз Мақомоти иҷроияи ҳокимияти давлатии вилояти Суғд ба мухбири АМИТ «Ховар» иттилоъ доданд,  баргузории намоишгоҳ дар доираи ҳамкории судманди ҷонибҳо сурат гирифта, ба хотири наздик намудани аҳли тиҷорат, пайдо намудани шарикони боэътимод ва мустаҳкам намудани дӯстӣ миёни халқҳои ду кишвар роҳандозӣ шудааст.

Бояд зикр кард, ки намоишгоҳи мазкур соли чорум аст, ки дар вилоят баргузор мешавад.

Ёдрас мешавем, ки намоишгоҳ 26 июл оғоз ёфта, то 8 август идома меёбад.