Имкониятҳои сайёҳии Тоҷикистон дар маҷаллаи Аморатҳои Муттаҳидаи Араб муаррифӣ мегарданд

ДУШАНБЕ, 26.08.2017 /АМИТ «Ховар»/. Бо мақсади муаррифии имкониятҳои сайёҳии  Тоҷикистон дар дохил ва хориҷи мамлакат аз ҷониби Кумитаи навтаъсиси рушди сайёҳии назди Ҳукумати ҶТ  тадбирҳо андешида мешаванд.

Аз ҷумла, ҷиҳати муаррифии соҳаи сайёҳӣ ба мамлакатҳои ҷаҳони араб  вохўрии Раиси Кумитаи рушди сайёҳии назди Ҳукумати Ҷумҳурии Тоҷикистон нуъмон Абдуғаффорзода  бо муҳаррири маҷаллаи «Молия ва Тиҷорат»-и Амороти Муттаҳидаи Араб   Файсал Абу Мезайд ва гуруҳи эҷодии ин маҷалла баргузор гашт.

Зимни вохурӣ оид ба ислоҳоти бо ташаббуси Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон амалигашта дар самти рушди сайёҳӣ маълумот дода шуда, имкониятҳои сайёҳии кишвар муаррифӣ гардиданд.

Ҷонибҳо ба хулоса омаданд, ки имкониятҳои сайёҳии Тоҷикистон дар саҳифаҳои маҷаллаи мазкур ва дигар васоити ахбори оммаи Амороти Муттаҳидаи Араб мунтазам муаррифӣ карда мешаванд.

Чорабиниҳои мазкур барои шиносоӣ аз имкониятҳои сайёҳии мамлакат ва ҷалби васеи сайёҳони Амороти Муттаҳидаи Араб ва дигар кишварҳои арабӣ мусоидат хоҳад намуд.