Мушкилии нарасидани оби нӯшокӣ дар маркази ноҳияи Тоҷикобод имсол ҳам ҳалли худро наёфт

ТОҶИКОБОД, 08.12.2017 /АМИТ «Ховар»/. Сокинони деҳаҳои  Капалӣ ва Қалъаи лаби оби  маркази ноҳияи Тоҷикобод солҳои тӯлонист, ки аз нарасидани оби нӯшокӣ, махсусан дар фасли зимистон  азоб мекашанд ва ҳамеша барои гирифтани оби тозаи нӯшокӣ соатҳо интизор мемонанд. Раиси Ҷамоати деҳоти Қалъаи лаби оби маркази ноҳия Ёдгор Тӯйчиев  мегӯяд, ки нарасидани оби нӯшокӣ бештар дар маркази ноҳия  ба мушоҳида мерасад. Хатҳои оби нӯшокии  ба маркази ноҳия кашидашуда талаботи шаҳрвандонро қонеъ карда наметавонанд, чунки ин қубурҳо  корношоям гардида, сокинон бо мушкилиҳои зиёд рӯ ба рӯянд. Мутаассифона, дар  буҷаи ҷамоати деҳот барои таъмини аҳолӣ бо оби нӯшокӣ  ва таъмиру тармими  хатҳои обӣ нушокӣ  маблағ пешбинӣ нагардидааст, аз ин рӯ  маъмурияти ҷамоат  имконияти бартараф кардани  чунин норасоиҳоро надорад.

Ёдгор Тӯйчиев баён дошт, ки бо супориши раиси ноҳия ҷиҳати  иҷрои Қарори Ҳукумати Ҷумҳурии Тоҷикистон «Дар бораи сари вақт омода намудани соҳаҳои иқтисодиёту иҷтимоиёти ҷумҳурӣ  барои фаъолияти мунтазам ва самарабахш дар давраи тирамоҳу зимистони солҳои 2017-2018» моҳи октябр ва аввали моҳи ноябр хатҳои оби нӯшокии  маркази ноҳия таъмиру тармим гардида бошанд ҳам, мушкилии нарасидани оби нӯшокӣ ба аҳолӣ ҳанӯз ҳам мушоҳида мегардад.

Масъулини ҳукумати ноҳия мегӯянд, ки барои бо оби ошомиданӣ  пурра таъмин намудани  сокинони ноҳия  тадбирҳои амалӣ андешида, барои ҷалби сармоягузорони  ватанию хориҷӣ кӯшиш ба харҷ дода истодаанд.