Вазири корҳои хориҷии Тоҷикистон дар Вена мулоқотҳои судманд анҷом дод

ДУШАНБЕ, 08.12.2017 /АМИТ «Ховар»/. 7 декабри соли 2017 дар ҳошияи иҷлосияи 24-уми Шӯрои вазирони корҳои хориҷии Созмони амният ва ҳамкорӣ дар Аврупо (САҲА) дар ш. Вена мулоқоти Вазири корҳои хориҷии Ҷумҳурии Тоҷикистон Сироҷидин Аслов бо Комиссари олии Созмони амният ва ҳамкорӣ дар Аврупо (САҲА) оид ба ақаллиятҳои миллӣ Ламберто Занниер баргузор гардид. Дар ин бора аз Вазорати корҳои хориҷии Ҷумҳурии Тоҷикистон хабар доданд.

Зимни мулоқоти мазкур ҷонибҳо дурнамои ҳамкории минбаъдаи кишварро бо Дафтари Комиссари олӣ оид ба ақаллиятҳои миллӣ мавриди баррасӣ қарор дода, инчунин роҷеъ ба пешбурди ҳамкорӣ дар самти таъмини сулҳу субот дар паҳнои САҲА ва эҳтироми ҳуқуқи инсон мубодилаи афкор намуданд.

Ҳолати кунунӣ ва дурнамои ҳамкории мутақобилан судманди Тоҷикистону Канада дар мулоқоти Вазири корҳои хориҷии Ҷумҳурии Тоҷикистон Сироҷидин Аслов бо Вазири корҳои хориҷии Канада хонум Кристиа Фриланд баррасӣ гардид.

Зикр гардид, ки ҳамкории Тоҷикистон бо Канада тавассути Агентии байналмилалии Канада оид ба рушд (CIDA) ба таври самарабахш сурат гирифта, он ба соҳаҳои кишоварзӣ, тандурустӣ ва маориф равона шудааст. Дар ин замина, изҳори умедворӣ гардид, ки муносибатҳои дуҷониба дар дигар соҳаҳои муҳим, аз ҷумла, обу энергетика, тағйирёбии иқлим, таҳкими сарҳади давлатӣ, мубориза бар зидди терроризм, ифротгароӣ ва қочоқи маводи мухаддир низ тақвият дода хоҳанд шуд. Ҳамчунин ҷонибҳо роҷеъ ба густариши ҳамкорӣ дар доираи созмонҳои байналмилалӣ ва минтақавӣ, инчунин чорабиниҳои байнамилалие, ки соли 2018 дар Тоҷикистон ба нақша гирифта шудаанд, ибрози ақида намуданд.