Дар Душанбе Фестивали гурӯҳи эҷодии кӯдаконаи «Ҳафтранг» баргузор мешавад

ДУШАНБЕ, 18.01.2018. /АМИТ «Ховар»/. Пагоҳ, 19 январи соли равон соати 18:00 дар Театри давлатии академии опера ва балети ба номи С. Айнӣ Фестивали гурӯҳи эҷодии кӯдаконаи «Ҳафтранг» баргузор мегардад.

Фестивал бо дастгирии Вазорати фарҳанги Ҷумҳурии Тоҷикистон ва намояндагии «Россотрудничество» дар Ҷумҳурии Тоҷикистон гузаронида мешавад.

Тавре   аз маркази матбуоти Вазорати фарҳанги Ҷумҳурии Тоҷикистон ба мухбири АМИТ «Ховар» хабар доданд, дар барномаи консертӣ дар радифи дигар дастпарварони студияи «Ҳафтранг», ғолибони озмуни телевизионии «Бо тамоми овоз», ки дар Федератсияи Россия баргузор гардида буд, Амал Ҳафизова, Дилноза Абдуалимова, Томирис Илназарова ва Некруз Зребунов ҳунарнамоӣ мекунанд.

Дар фестивали мазкур инчунин ҳунарнамоии ҳунарпешагон Таҳмина Рамазонова-роҳбари студияи «Ҳафтранг», Зафар Абдуалимов, Баха-84 ва Мадина Ақназарова дар назар аст.