Зоир Раҳмонзода: «Дар Тоҷикистон ҳуқуқи зану мард баробар аст»

ДУШАНБЕ,  6.03.2018. /АМИТ «Ховар»/. Ҳукуқи занону мардон дар Тоҷикистон баробар аст ва инро давлат кафолат додааст. Ҳукумати Ҷумҳурии Тоҷикистон ба масъалаи дастгирии занону модарон аҳамияти аввалиндараҷа дода, ин иқдомро ба яке аз самтҳои муҳими сиёсати давлат табдил додааст. Ин нуктаро имрӯз раиси Кумитаи иҷроияи Ҳизби Халқии Демократии Тоҷикистон дар шаҳри Душанбе Зоир Раҳмонзода зимни баргузории конфронс ба муносибати таҷлили Рӯзи Модар иброз дошт.

Зоир Раҳмонзода занону бонувонро бо ин рӯзи фархунда табрик намуда, зикр намуд, ки имрӯзҳо аз шумораи умумии беш аз 19 ҳазор нафар хизматчиёни давлатӣ қариб 4200 нафар ё 22 фоизро занон ташкил медиҳанд. Ҳоло 70 фоизи кормандони соҳаи маориф ва 60 фоизи кормандони соҳаи тандурустиро низ занон ташкил медиҳанд, ки ин аз баланд бардоштани мақоми зан – модар дар Тоҷикистон дарак медиҳад.

Тавре хабарнигори АМИТ «Ховар» иттилоъ медиҳад, дар кори конфронс ҳамчунин дар мавзӯи «Мавқеи зан дар ташккули фарҳанги ҳуқуқии ҷомеа» вакили Маҷлиси намояндагони Маҷлиси Олӣ Эмомалӣ Насриддинзода сухан гуфта, зикр намуд, ки «зан сарчашмаи на танҳо ҳаёти инсон, балки рамзи некию хайрхоҳӣ, дилсӯзию муҳаббат ва зебоию нафосат мебошад».

Эмомалӣ Насриддинзода ҳамчунин иброз намуд, ки дар Ҷумҳурии Тоҷикистон қонуни махсусе дар заминаи Конститутсияи Ҷумҳурии Тоҷикистон қабул гардидааст, ки он Қонуни Ҷумҳурии Тоҷикистон «Дар бораи кафолатҳои давлатии баробарҳуқуқии мардону занон ва имкониятҳои баробари амалигардонии онҳо» ном дорад. Дар ин қонун мавқеи зан дар пешрафти ҷомеа, низоми сиёсиву ҳуқуқӣ ва ҳамаи шохаҳои ҳокимияти давлатӣ нишон дода шудааст.