Дар Душанбе тақвияти ҳамкории мақомоти гумруки давлатҳои аъзои СҲШ баррасӣ гардид

ДУШАНБЕ, 24.04.2018/АМИТ «Ховар»/. «Мақомоти гумрук бояд ба ҳамкории иқтисодии  минтақавӣ ва фароҳам овардани шароити мусоид барои  рушди тиҷорат ва сармоягузорӣ мусоидати фаъол дошта бошанд». Чунин зикр намуд муовини аввали Сардори Хадамоти гумруки назди Ҳукумати Ҷумҳурии Тоҷикистон Азим Турсунзода зимни ифтитоҳи ҷаласаи 33-юми Гурӯҳи кории махсус оид ба ҳамкории гумрукии  давлатҳои аъзои Созмони Ҳамкории Шанхай /СҲШ/, ки имрӯз дар шаҳри Душанбе доир гардид.

Хабарнигори АМИТ «Ховар» иттилоъ медиҳад, ки дар ҷаласаи 33-юми Гурӯҳи кории махсус оид ба ҳамкории гумрукии давлатҳои аъзои СҲШ намояндагони мақомоти салоҳиятдор — хадамотҳои гумруки давлатҳои аъзои СҲШ — Тоҷикистон, Ӯзбекистон, Қирғизистон, Қазоқистон, Россия, Чин, Покистон ва Ҳиндустон иштирок намуданд.

Дар ҷараёни ҷаласа масъалаҳои марбут ба таҳкими ҳамкории мақомоти гумруки давлатҳои аъзои СҲШ  дар соҳаи  назорати гумрукӣ,  муқаррарот оид ба вазъи тасдиқи лоиҳаи махсуси Гурӯҳи кории оид ба ҳамкории гумрукии давлатҳои  аъзои СҲШ, омода намудани лоиҳаи ҳуҷҷатҳо барои имзо дар вохӯрии нахустини роҳбарони мақомоти гумруки давлатҳои аъзои СҲШ, табодули иттилоот байни мақомоти гумруки давлатҳои аъзои СҲШ, инчунин  ҷараёни татбиқи Ёддошти тафоҳум миёни хадамотҳои гумруки давлатҳои аъзои СҲШ доир ба ҳамкорӣ дар бахши ҳифзи моликияти зеҳнӣ, таъсиси низоми  ягонаи транзитӣ дар фазои СҲШ ва дурнамои тақвияти ҳамкории мақомоти гумруки давлатҳои аъзои СҲШ баррасӣ гардиданд.

Бояд тазаккур дод, ки баргузории ҷаласаи 33-юми Гурӯҳи кории махсус оид ба ҳамкории гумрукии давлатҳои аъзои СҲШ дар Душанбе дар Соли рушди сайёҳӣ ва  ҳунарҳои мардумӣ рост меояд, аз ин рӯ иштирокдорони ҷаласа аз маконҳои фарҳангию фароғатӣ, таърихӣ ва мавзеъҳои диданибоби Тоҷикистон, назири «Кохи Наврӯз», Осорхонаи миллӣ, Боғи фарҳангу фароғатии ба номи Садриддин Айнӣ ва дараи Варзоб боздид менамоянд.

Созмони Ҳамкории Шанхай соли  2001 таъсис ёфта, қароргоҳаш дар шаҳри Пекини Чин мебошад. Алҳол ба СҲШ ҳашт давлат — Тоҷикистон, Ӯзбекистон, Қирғизистон, Қазоқистон, Россия, Чин, Покистон ва Ҳиндустон шомил мебошанд.