Халил Иброҳим Акча: «Истифодаи иқтидори бузурги рушди сайёҳӣ дар Соли рушди сайёҳӣ ва ҳунарҳои мардумӣ бар нафъи давлатҳои аъзои Созмони Ҳамкории Иқтисодӣ муҳим аст»

ДУШАНБЕ, 16.04.2018 /АМИТ «Ховар»/. Тавре қаблан иттилоъ додем, имрӯз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҳошияи Ҷаласаи 23 — юми Шӯрои вазирони корҳои хориҷии кишварҳои аъзои Созмони Ҳамкории Иқтисодӣ (СҲИ) Дабири кулли ин Созмон Халил Иброҳим Акча ва Вазири корҳои хориҷии Ҷумҳурии Исломии Афғонистон Салоҳиддин Раббониро ба ҳузур пазируфтанд.

Баъди мулоқот бо Пешвои миллат Дабири кулли СҲИ Халил Иброҳим Акча дар назди хабарнигорон иброз намуд, ки зимни вохӯрӣ  дурнамои ҳамкории бисёрҷонибаи иқтисодӣ дар доираи СҲИ, масъалаҳои ҳамкорӣ дар соҳаҳои нақлиёт, тиҷорат, энергетика, энергияи электрикӣ, иқтисодиёт, сайёҳӣ ва татбиқи лоиҳаҳои гуногуни аҳамияти минтақавидоштаро мавриди муҳокима қарор додаанд.

Халил Иброҳим Акча аз эълон гардидани Соли рушди сайёҳӣ ва ҳунарҳои мардумӣ дар Ҷумҳурии Тоҷикистон изҳори ҳавасмандӣ намуда, зикр кард, ки маҳз дар ин сол дар Тоҷикистон баргузории як зумра чорабиниҳои сатҳи баландро ба нақша гирифтаанд. «Истифодаи иқтидори бузурги рушди сайёҳӣ дар Соли рушди сайёҳӣ ва ҳунарҳои мардумӣ бар нафъи давлатҳои аъзои ин Созмон бисёр муҳим аст», — изҳор дошт Халил Иброҳим Акча.

Вазири корҳои хориҷии Ҷумҳурии Исломии Афғонистон Салоҳиддин Раббонӣ дар ҳузури рӯзноманигорон аз ҳамкорӣ ва кумакҳои ҳамаҷонибаи мардуми Тоҷикистон, алалхусус Пешвои миллати тоҷикон изҳори миннатдорӣ кард.

Салоҳиддин Раббонӣ иброз дошт, ки дар мулоқот бо Президенти Ҷумҳурии Тоҷикистон муҳтарам Эмомалӣ Раҳмон ба масъалаҳои ҳамкории дуҷониба дар самтҳои иқтисодӣ, иҷтимоӣ, энергетикӣ, ва нақлиётӣ, истиқрори сулҳу субот ва амният дар Афғонистон, муборизаи муштарак алайҳи гардиши ғайриқонунии маводи мухаддир ва терроризм таваҷҷуҳи махсус зоҳир намудаанд.