Иштироки Сироҷидин Аслов дар ҷаласаи Шӯрои вазирони корҳои хориҷии давлатҳои аъзои Созмони Ҳамкории Шанхай

ДУШАНБЕ, 24.04.2018 /АМИТ «Ховар»/. 24  апрели соли 2018  Вазири корҳои хориҷии Ҷумҳурии Тоҷикистон Сироҷидин Аслов дар ҷаласаи  навбатии  Шӯрои вазирони корҳои хориҷии давлатҳои аъзои СҲШ дар шаҳри Пекин ширкат варзид. Дар ин бора ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд.

Зимни суханронии худ дар ҷаласаи мазкур С.Аслов роҷеъ ба мавқеи Ҷумҳурии Тоҷикистон оид ба масъалаҳои калидии хамкориҳо дар ҳошияи СҲШ ва дурнамои тақвият бахшидани онҳо, инчунин вобаста ба мавзӯъҳои мубрами минтақавӣ ва ҷаҳонӣ изҳори назар намуд.

Дар ҳошияи омодагӣ ба ҷаласаи Шӯрои сарони давлатҳои аъзои СҲШ, ки қарор аст 9-10 июни соли 2018 дар шаҳри Тсиндаои Чин доир гардад, роҳбарони ҳайатҳо як зумра мавзӯъҳо ва лоиҳаҳои ҳуҷҷатҳоро оид ба фаъолияти СШҲ баррасӣ намуда, вобаста ба онҳо қарорҳои дахлдор қабул карданд. Дар ҷаласа ҳамчунин масъалаҳои муҳими минтақавӣ ва байналмилалӣ мавриди муҳокима қарор гирифтанд.

Иштирокдорони ҷаласа ба Чин ҳамчун раисикунанда дар Созмони Ҳамкории Шанхай, бахусус корҳои басомонрасондаи ин ҷониб дар ҷодаи омодагӣ ҷиҳати баргузор намудани ҷаласаи Шӯрои сарони давлатҳои аъзои СҲШ 9-10 июни соли 2018 дар шаҳри Тсиндао, баҳои баланд доданд. Ҷонибҳо изҳори умед намуданд, ки натиҷаҳои нишасти мазкур дар таҳкими равобити иқтисодию тиҷоратӣ, амнияту субот, ҳамсоядорӣ, дӯстӣ, муттаҳидӣ, фароҳам овардани ҳусни боварӣ ва эътимод миёни давлатҳои аъзои ин Созмон мусоидат хоҳад кард.

Ҷаласа дар фазои дӯстона ва ҳамдигарфаҳмӣ, ки хоси муносибатҳои анъанавии давлатҳои аъзои СҲШ мебошад, доир гардид.