Кумитаи рушди сайёҳӣ маҳсули ҳунари заргаронро дар Боғи «Ирам» ба намоиш мегузорад

ДУШАНБЕ, 20.04.2018 /АМИТ «Ховар»/. Бо дастуру супоришҳои Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва таҳти сарпарастии Президенти Федератсияи футболи мамлакат Рустами Эмомалӣ, Кумитаи рушди сайёҳӣ 21 апрели соли 2018 дар Боғи «Ирам» маҳсули ҳунари заргарони кишварро таҳти унвони «Рӯзи заргарон» пешкаши сокинони пойтахт ва сайёҳони хориҷӣ мегардонад.

Тавре ба АМИТ «Ховар» аз Кумитаи рушди сайёҳӣ хабар доданд, чорабинии мазкур ба Рӯзи пойтахт бахшида шуда, Кумита тасмим гирифтааст, ки минбаъд низ дар доири Соли рушди сайёҳӣ ва ҳунарҳои мардумӣ чунин намоишҳоро, аз қабили  «Рӯзи оҳангарон», «Рӯзи чармгарон», «Рӯзи чӯбтарошон», «Рӯзи косибон», «Рӯзи чакандӯзон» ва «Рӯзи атласбофон» баргузор намояд.

Ташкил ва баргузории чорабиниҳои мазкур дар муаррифии ҳунарҳои мардумӣ ҳамчун армуғони арзанда барои сайёҳон ва ҷалби бештари сайёҳони хориҷӣ ба Тоҷикистон нақши бузург дорад.