Дар Душанбе Конфронси байналмилалии сатҳи баланд таҳти унвони «Муқовимат бо терроризм ва ифротгароии хушунатомез» баргузор мегардад

Май 1, 2018 16:56

ДУШАНБЕ, 01.05.2018 /АМИТ «Ховар»/. Ҳукумати Ҷумҳурии Тоҷикистон бо мушорикати Созмони Милали Муттаҳид (СММ), Созмони Амният ва Ҳамкорӣ дар Аврупо (САҲА) ва Иттиҳоди Аврупо рӯзҳои 3-4 майи соли 2018 дар шаҳри Душанбе Конфронси байналмилалии сатҳи баланд  таҳти унвони «Муқовимат бо терроризм ва ифротгароии хушунатомез»-ро баргузор мекунад.  Дар ин бора ба АМИТ «Ховар» аз Вазорати корҳои хорҷии Ҷумҳурии Тоҷикистон хабар доданд.

То ба имрӯз 400 иштироккунанда аз 46 кишвари ҷаҳон ва 30 созмонҳои байнламилалӣ ва минтақавӣ, инчунин марказҳои илмиву тадқиқотӣ ҷиҳати иштирок дар ин чорабинӣ ба қайд гирифта шудаанд.

Дар кори Конфронс роҳбарон ва намояндагони воломақоми  идораҳои сиёсати хориҷӣ ва дигар сохторҳои соҳавии Казоқистон, Қирғизистон, Ӯзбекистон, Туркманистон,  Венгрия, Швейтсария, Баҳрайн, Ҳиндустон, Арманистон, Россия, Хитой, ИМА, Испания, Германия, Чехия, Полша, Эстония, Канада, Белгия, Словакия, Шветсия, Британияи Кабир, Украина, Ҷумҳурии Корея, Япония, Индонезия, Эрон, Туркия, Афғонистон, Ироқ, Покистон, Қатар, Марокаш, Урдун, Кувайт, Умон, Алҷазоир,  Сурия, Либия ва дигар кишварҳо иштирок хоҳанд кард. Дар кори конфронс роҳбарон ва намояндагони созмонҳои байналмилалӣ ва минтақавӣ, аз қабили СММ, САҲА, Иттиҳоди Аврупо, Созмони Аҳдномаи амнияти дастаҷамъӣ, Созмони Ҳамкории Шанхай, ИДМ, корпуси дипломатӣ ва шарикони рушд, ҷомеаи шаҳрвандӣ,  институтҳои тадқиқотӣ  ва дигарҳо низ иштирок менамоянд.

Ҳадафҳои Конфронси байналмилалӣ таҳкими ҳамкории мутақобила оид ба масоили муайян ва пешгирии амалиёти террористии фаромарзӣ, тавсеаи заминаи ҳуқуқӣ барои таҳкими минбаъдаи ҳамкорӣ барои муқовимат бо терроризм миёни кишварҳо, баррасии мушкилоти  ҷорӣ  дар ростои амалисозии чораҳои мубориза бар зидди терроризм, ҳамкорӣ дар самти муқовимат алайҳи  ҷиноятҳои кибернетикӣ мебошанд.

Конфронс ҷиҳати фароҳам овардани замина барои муколамаи фарогир ва ҳамкориҳои тарафҳои манфиатдор бо мақсади  табодули таҷриба ва таҳияи амалҳои дақиқ барои фаъолияти  минбаъди  муштараки ҳамоҳангшуда  дар чорчӯби мубориза ба таҳдиду хатарҳои муосир  хизмат хоҳад кард.

Дар анҷоми  конфронс ҳуҷҷати ниҳоӣ қабул хоҳад шуд.

 

Май 1, 2018 16:56

Хабарҳои дигари ин бахш

Нишасти навбатии Гурӯҳи корӣ дар қолаби С5+Олмон баргузор гардид
Тоҷикистон аз созиши оташбас байни Исроил ва Эрон истиқбол менамояд
Сафири Тоҷикистон ба Президенти Малдив эътимоднома супорид
Дар Душанбе тақвияти ҳамкорӣ байни Тоҷикистон ва Қатар дар соҳаи иқтисоду тиҷорат баррасӣ шуд
Сироҷиддин Муҳриддин дар ҷаласаи вазирони корҳои хориҷии давлатҳои аъзои Созмони ҳамкории исломӣ иштирок намуд
Тоҷикистон зарбаҳои неруҳои ҳарбии ҳавоии Амрико ва Исроилро ба иншооти ҳастаии Эрон қатъиян маҳкум мекунад
Роҳбарони агентиҳои давлатии иттилоотии кишварҳои ИДМ дар Санкт-Петербург рушди ҳамкориро баррасӣ намуданд
Дар Душанбе Конфронси байналмилалӣ «Осиёи Марказӣ – меҳвари СҲШ: 25 соли ҳамкорӣ ба хотири рушди муштарак» доир гардид
Дар Корея аз иқдомҳои Тоҷикистон дар самти мубориза бо биёбоншавӣ ва хушкӣ ёдовар шуданд
Дар Душанбе машваратҳои сиёсӣ байни вазоратҳои корҳои хориҷии Тоҷикистон ва Венесуэла баргузор шуд
Байни давлатҳои Осиёи Марказӣ ва Чин Паймони ҳамсоягии абадӣ, дустӣ ва ҳамкорӣ ба имзо расид
Шараф Шерализода дар иҷлосияи 59-уми Шурои ҳуқуқи инсони СММ иштирок намуд