Чемпионати ҷаҳон-2018: Муҳаммад Салоҳ дар бозии аввали дастаи мунтахаби Миср иштирок мекунад

ДУШАНБЕ, 07.06.2018 /АМИТ «Ховар»/. То оғози бозиҳои финалии Чемпионати ҷаҳон-2018 дар Россия  7 рӯзи дигар боқӣ монд. Шореҳи футболи АМИТ «Ховар» Аловиддин БӮРИЕВ шарҳи худро дар бораи бозии дуюми Мундиал бо ширкати дастаҳои мунтахаби Миср ва Уругвай идома медиҳад.

Сармураббии дастаи мунтахаби Миср Эктор Купер мужда дод, ки ситораи футболи Миср ва ҷаҳон Муҳаммад Салоҳ баъди лат бардоштанаш дар вохӯрии финалии Лигаи чемпионҳои Аврупо омода мешавад, то дар бозии аввали дастаи мунтахаби Миср бо Уругвай ба майдон ояд. Ба қавли сармураббӣ, «як бозингар наметавонад масъулияти куллро ба уҳда гирад ва агар Муҳаммад то бозии аввал шифо наёбад, дигар бозингаре ҳаст, ки метавонад ӯро иваз намояд»,-афзудааст Купер.

15 июн. Шаҳри Екатеринбург. Бозии рақами 2.  Расо соати 17 ба вақти Душанбе дастаҳои мунтахаби Миср ва Уругвай ба майдон меоянд.  Миср як вохӯрӣ пеш аз анҷоми мусобиқоти интихобии гурӯҳӣ, баъди 28 сол, ба даври финалии Чемпионати ҷаҳон роҳхат гирифт. Роҳи тайкардааш хеле душвор буд.

Миср-роҳ ба сӯи Россия

Пеш аз бозиҳои интихобии гурӯҳӣ дастаи мунтахаби Миср дар маҳрумбозиҳо футболбозони кишвари Чадро бо натиҷаи калони 4:1 мувоҷеҳи шикаст кард ва ба  бозиҳои гурӯҳӣ роҳ ёфт. Қуръакашии бозиҳои интихобӣ дастаи мунтахаби Мисрро бо дастаҳои мунтахаби Уганда, Гана ва Конго ба гурӯҳи И шомил кард. Марҳалаи гузариш барои мисриҳо дар аввал осон шурӯъ гардид. Футболбозони ин даста дар сафар дастаи мунтахаби Конгоро бо натиҷаи 2:1 шикаст дода, дар бозии хонагӣ бар ҳарифи душворгузари худ -дастаи мунтахаби Гана бо нишондоди 2:0  пирӯзӣ ба даст оварданд. Ғайричашмдошт футболбозони Уганда, ки мавқеашон дар Африқо он қадар назаррас нест, дар даври сеюм мисриҳоро бо ҳисоби 1:0 мағлуб намуда, ба дили онҳо тарсу ваҳм ҷой доданд, аммо дар бозии ҷавобӣ футболбозони Миср тавонистанд, ки бо ҳамон натиҷаи мағлубшудаашон дар гурӯҳ пешсафии мутлақро сазовор гарданд. Бозии ҳалкунанда ва тақдирсоз барои футболбозони дастаи мунтахаби Миср дар варзишгоҳи «Бурҷи Араб» бозӣ бо дастаи мунтахаби Конго ба ҳисоб мерафт. Ин вохӯрии ниҳоят ҷолиб бо ғалабаи мисриҳо бо нишондоди 2:1 ҷамъбаст гардид, ки дар он ду тӯбро беҳтарин бозингари дастаи мунтахаби Миср ва беҳтарин бозингари Африқо дар соли 2017 Муҳаммад Салоҳ ба ҳадаф расонид. Ин ғалаба пеш аз дидори охирин бо дастаи мунтахаби Гана, ки он ҳам бо ҳисоби 1:1 ба анҷом расид, роҳи футболбозони Мисрро ба сӯи Россия ҳамвор кард.

Ҷадвали ҷамъбастии гурӯҳ

Дар ҳайати дастаи Миср бозингари аз ҳама шинохта имрӯз Муҳаммад Салоҳ номбар мешавад, ки соли 2017 аз дастаи «Рома»-и Италия ба «Ливерпул» гузашт. Расонаҳо хабар медиҳанд, ки Муҳаммад Салоҳ ҳамаи голҳои тақдирсози дастаи мунтахаби Мисрро дар бозиҳои интихобӣ ба самар расонидааст. Албатта, ба ин гуфтаҳо шакку шубҳае нест.

Муҳаммад Салоҳ 15 июни соли 1992 дар Басуюни ғарбии Миср  ба дунё омадааст. Аз наврасиаш зери назорати мураббиёни дастаҳои мунтахаби ҷавону наврасони Миср қарор гирифт ва соли 2011 дар Чемпионати ҷаҳон байни ҷавонон иштирок карда,  ба бозиҳои Олимпии Лондон омад. Албатта, ин ҷавони болаёқат зуд ҷои худро дар дастаҳои аврупоӣ пайдо кард ва бо дастаи «Базел»-и Швейтсария шарномаи худро ба имзо расонд. Дар аввалин соли ҳунарнамоияш унвони чемпиониро ба даст овард ва ба ҳайси бозингари беҳтарини Африка шинохта шуд. Баъди ду соли ҳунарнамоӣ клуби футболи «Челси» ба ӯ мароқ зоҳир кард ва Муҳаммадро ба Англия овард. Дар ҳайати дастаи «Челси» ду сол ҳунарнамӣ карда,  13 бозӣ гузаронид ва 2 гол ҳам зад. Аммо ӯро чемпионтаи Италия ва КФ «Фиорентина» интизор буд. Ба як маъно «Челси» ӯро ба иҷора дод. Дар дастаи «Фиорентина» ҳунарнамоиаш шоёни таҳсин буд, аммо клуби футболи «Рома»  ба Муҳаммад Салоҳ бештар ниёз дошт ва ӯро ба ҳайати даста ҳамроҳ кард.

Муҳаммад Салоҳ оҳиста-оҳиста ба ситораи дурахшон табдил меёфт. Голҳои пайдарҳамаш «Рома»-ро ба сӯи қуллаҳои баланд роҳнамун  месохтанд.  Ду сол дар ин клуб бозӣ карду дар 65 вохӯрӣ 29 гол зад. Манзалаташ боло мерафт ва дастаҳои беҳтарини Аврупо ӯро дар ҳайаташон дидан мехостанд. Ниҳоят ӯ 22 июни соли 2017 бо маблағи 42 миллион евро ба дастаи «Ливерпул»-и Англия гузашт. Аз як вохӯрӣ то вохӯрии дигар Муҳаммад Салоҳ дар ҳайати дастаи «Ливерпул» аз худ нақши босазо мегузошт ва ба пеш мерафт. Шояд дар Чемпионати ҷаҳони соли 2018 Муҳаммад Салоҳ яке аз ситораҳои тобони ин мундиал гардад.

Дар ҳайати дастаи мунтахаби Миср, ба ғайр аз Муҳаммад Салоҳ, дигар бозингароне низ ҳастанд, ки метавонад дар Чемпионати ҷаҳон ҳамчун ситора дурахшанд. То ҳол дарвозабони ин даста Эссам Хаддурии 45- сола аз ҷавонон қафо намонда, ба майдон меояд. Шояд ӯ рекорди аз ҳама бозингари солорро дар чемпионатҳои ҷаҳон дигар намояд. Шояд. Имкон дорем, бо дигар бозингарони намоёни дастаи мунтахаби Миср шинос шавем.

Дуввумин ситорае, ки баъди Муҳаммад Салоҳ дар дастаи мунтахаби Миср номбар мешавад, ин Муҳаммад Анненӣ мебошад. Ҳар дуи ин бозингарон бо ҳам баробар қадам мезаданд. Дар дастаи «Макблу» аз соли 2010 сар карда, ба дастаи мунтахаби ҷавонон даъват шуданд ва соли 2011 то бозиҳои 1/8- ниҳоии Чемпионати ҷаҳон расиданд. Баъди як сол дар Олимпиадаи Лондон ҳам маҳорати хуб нишон доданд. Дар вохӯрӣ бо дастаи мунтахаби Бразилия маҳз аз партофти Анненӣ Муҳаммад Салоҳ ба задани гол қодир шуд. Он вақт дастаи мунтахаби Миср то ба бозиҳои чорякфиналӣ баромад. Худи ҳамон сол Анненӣ бо дастаи «Базел» шарномаашро ба имзо расонид. Шаш моҳ пештар Муҳаммад Салоҳ ба ин даста гузашта буд. Бо «Базел» Анненӣ чор маротиба унвони чемпиониро ба даст овард. Зарбаҳое, ки ин бозингар аз масофаи дур мезанад, хатарноканд. Ӯ дар байни мухлисону мураббиён соҳиби обрӯи баланд гардида буд. Соли гузашта Муҳаммад Анненӣ ба маблағи 12,5 миллион евро ба дастаи «Арсенал» гузашт. Голи задаи ӯ дар варзишгоҳи Энфилд аз беҳтарин голҳои моҳ дар Англия дониста шуд ва ду маротиба бозингари беҳтарин эътироф гардид. Ҳоло ӯ дар бозии Премер-Лига кам ба майдон меояд, аммо дар бозиҳои Лигаи Аврупо иштирок карда, голҳои зебо мезанад. Ба наздикӣ голи задаааш ба дарвозаи Бате аз беҳтаринҳо буд. Дар дастаи мунтахаби Миср аз оғоз то ба анҷом дар майдон бозӣ мекунад ва бо Муҳаммад Салоҳ Анненӣ дар дастаи мунтахаби Миср як ҷуфти хуберо ташкил кардаанд.

Барои он ки малакаи бозингарон беҳтар шавад, нуҳ бозингари дастаи мунтахаби Арабистони Саудӣ бе музду маблағ ба Ла-Лигаи Испания гузаштанд. Ин маънои онро дорад, ки ҳар қадар бозингарон дар хориҷи кишвар ҳунарнамоӣ кунанд, даста пурқувваттар хоҳад шуд. Гурӯҳе аз  ҷавонони дастаи мунтахаби Миср дар дастаҳои дигари номдори Аврупо бозӣ мекунанд.

Рамадан Субҳӣ аз қабили онҳост. Ӯ дар дастаи «Сток Сити»-и Англия фаъолият дорад. Рамадан мисли Мидуи номдор аз ҷавонӣ диққати клубҳои хориҷиро ба худ ҷалб кард ва тобистони соли 2016 ба дастаи «Сток Сити» гузашт. Мартин Ёл, мураббии ҳоландӣ, ки аз маҳорати олии Субҳӣ ба ваҷд омада буд ва ӯро машқ медод, ба Жозе Моринё номае ирсол кард, ки ин бозингарро бо худ гирад.

Субҳӣ дар «Сток Сити» ҷои худро ёфт. Баъди аз даста рафтани Арнаутович ӯ пайваста ба майдон мебарояд. Бозингари канорӣ буда, муҳофизатгаронро ҳамеша дар таҳлука меорад. Аз ин рӯ дар Чемпионати ҷаҳон Субҳӣ бо Салоҳ ва Анненӣ бозии дастаи мунтахаби Мисрро ҷолибу рангин мекунанд.

Намояндаи чоруми дастаи мунтахаби Миср-ин Аҳмад Ҳикозӣ мебошад, ки ӯ ҳам дар Аврупо, дар дастаи «Фиорентина»-и Италия бозӣ мекунад. Дар «Фиорентина» ва «Перуджи» кораш омад накард. Латбардориҳои зиёд ин бозингарро озор медиҳанд. Аммо мақоми дуввуми дастаи мунтахаби Миср  дар Африқо ӯро ба ҳайати дастаи яккачини  Африқо дохил кард. Баъдан ӯ ба ҳайати дастаи «Вест Бромич»-и Англия пайваст. Баъди голи пирӯзиоварро ба дарвозаи «Бортмутс» заданаш ҷои худро дар ҳайати асосии даста пайдо кард ва ҳоло ҳам ҳунарнамоӣ дорад.

Дигар бозингареро, ки ба шумо муаррифӣ мекунем, Аҳмад Ҳасан аст. Ӯ дар дастаи «Брага» бозӣ мекунад. Дар хати ҳуҷум ба майдон омада, голҳои зиёде задааст. Дар бозии Лигаи Аврупо голи задаашро ба дарвозаи «Порту» бо як эҳсосияти баланд ба падараш бахшидааст. Ӯ ҳамчунин голҳои худро дар радифи  ин бозиҳо ба дарвозаи «Фенерабахче» ва чандин клубҳои дигар равон сохтааст. Ӯро ҳам латбардориҳои зиёд азоб медиҳанд. Ба ҷавониаш нигоҳ накарда, дар Чемпионати Португалия 40 гол задааст.

Дарвозабони даста Эссам Хадури дар давраи бозиҳои ҷоми ҷаҳон ба синни 45 мерасад. Аммо дар симояш инро эҳсос кардан нашояд. Ӯ мисли ҷавонон ба бозиҳои Чемпионати ҷаҳон тайёрии пухта мебинад.

Мухлисон дар бозии футбол баъзан ақидае доранд,  ки футболбозони номдор метавонанд бе роҳбаладии мураббӣ ба натиҷаи хуб ноил шаванд, аммо ин тавр нест. Ғояву тактикаи мураббӣ дар бозии футбол бо ширкати  футболбозони номӣ спектали аҷибе меофарад, ки мо аз он лаззат мебарем.

Сармураббии аргентинагии дастаи мунтахаби Миср Эктор Куперро ситораи дуввум баъди Муҳаммад Салоҳ мешуморанд. 15 сол пеш ӯ  беҳтарин мураббии футбол ба шумор мерафт. Баъдан дар олами футбол ноаён гардид ва инак боз аз нав чун мураббии намоён дурахшид. Замоне ӯ дар Чемпионати Испания «Малёрка»-и назарногирро ба ҷои панҷуми Ла-Лига баровард ва дар финали Ҷоми малики Испания аз зарбаҳои пеналтӣ аз «Барселона» мағлуб шуд. Дар Суперҷом интиқоми худро аз «Барселона» ситонид ва ғалаба кард. Ӯ «Валенсия»-ро ҳам машқ дода, соҳиби медалҳои биринҷӣ гардидааст. Дар финали Лигаи чемпионҳои солҳои 2000 ва 2001 иштирок карда, аз «Бавария» дар задани силсилазарбаҳои пеналти мағлуб шудааст. Ҳамчун мураббии беҳтарини ҷаҳон низ эътироф шудааст.

Ба Купер муяссар гардид, ки баъди 28 сол дастаи мунтахаби Мисрро аз нав ба Чемпионати ҷаҳон барорад. Таҳти роҳбарии ӯ мисриҳо аз 30 вохӯрӣ дар 20- тоаш ғолиб омадаанд.

Дастаи мунтахаби Миср мисли дастаи мунтахаби Арабистони Саудӣ шаҳри Грознийро ҷои будубоши худ дар давраи Чемпионати ҷаҳон интихоб кард.

Уругвай – роҳ ба сӯи Россия

Акнун ба роҳи тайкардаи дастаи мунтахаби Уругвай назар мекунем. Ба ростӣ, гуфтан мумкин аст, ки дар гурӯҳе, ки дастаҳои мунтахаби Бразилия, Аргентина, Колумбия, Перу ва дигару дигарон ҷойгир шудаанд, бо ҷои дуюм ба бозиҳои финалии Чемпионати ҷаҳон роҳхат гирифтан кори шӯхӣ нест. Аммо Уругвай ҷои дастаи мунтахаби Аргентинаро бо ситораҳояш танг карда, баъди Бразилия мавқеъ гирифт.

Дастаи мунтахаби Уругвай дар аввалин бозиаш бар дастаи мунтахаби Боливия дар сафар бо ҳисоби 2:0 пирӯз гардида, бо рӯҳияи баланд ба бозиҳои минбаъда омода шуд ва ба мақсад расид.  Ҳарифи навбатиаш Колумбияро бо ҳисоби 3:0, Чили ва Венесуэларо бо ҳамин натиҷа, Парагвайро 4:0 ва Боливияро аз нав 4:1 шикаст дод ва бо дастаи пурқувват -Бразилия дар ду дидор дар майдонаш бо ҳисоби 1:4 мағлуб шуда, дар бозии баргашт 2:2 мусовӣ бозид. Аргентина ҳам дар Уругвай вохӯриро мусовӣ- 0:0 ҷамъбаст карда, дар бозии хонагиаш бо Уругвай бо ҳисоби 1:0 пирӯз гардид. Ба ғайр аз ду бохт аз дастаҳои номӣ футболбозони Уругвай боз аз дастаҳои Чилӣ 3:1 ва  Перу 2:1 ноком шудаанд. Дар ҷадвали ниҳоӣ дастаи мунтахаби Уругвай аз 18 вохӯрӣ дар 9-тоаш ғолиб омада, 4 бозиро мусовӣ анҷом дод ва дар 5 вохӯрӣ мағлуб гашт. Натиҷаи тӯбҳояш 32 бар 20-ро ташкил медиҳад.

Сарзамини Уругвай дар ҷаҳони футбол номҳоеро ба майдон овардааст, ки ҳамагон онҳоро мешиносанду медонанд. Имрӯз низ дастаи мунтахаби Уругвай бе ситора нест, аниқтараш ҳама бозингарони даста ситораҳое ҳастанд, ки дар пешбурди футболи ҷаҳон саҳм мегузоранд. Ҳарчанд дар Чемпионати соли 2014 Луис Суарес номи худро доғдор кард, аммо бо бозии зебояш ҳам дар ҳайати дастаи мунтахаби Уругвай ва ҳам «Барселона» онро шусту озода кард. Биёед дар бораи ситораҳои футболи Уругвай ҳам маълумоте пешниҳод кунем.

Якбора аз Луис Суарес ва ё Эдвин Кавани сар кардани ин саҳифа шояд маънои амиқ  надошта бошад. Ин ду ситорае, ки якеашон дигареро пурра мекунанд, дар дастаи мунтахаби Уругвай мавқеи баробар доранд. Онҳо ду донае ҳастанд, ки дар якҷоягӣ бо кумаки якдигар сатҳи футболи Уругвайро дигар мекунанду онро ба натиҷаҳои дилхоҳ мерасонанд. Яке дар дастаи «Барселона» бозӣ мекунаду дигаре дар «Пари-сен-Жермен»-и Фаронса. Онҳо дар якҷоягӣ нисфи голҳои дастаи мунтахаби Уругвайро ба самар расонидаанд. Якдигарро дар майдон хеле хуб эҳсос мекунанд. Эдинсон Кавани дар 14 бозии дастаи ПСЖ дар соли  равон ба дарвозаи ҳарифон 17 тӯб задааст. Бар замми ин дар бозиҳои лигаи чемпионҳои Аврупо дар 5 вохӯрӣ 6 гол ба самар расонидааст. 10 тӯби дастаи мунтахаби Уругвай низ ба ӯ тааллуқ доранд. Эдвинсон Кавани дар ҳайтаи дастаҳои итолиёвии «Наполи» ва «Палермо» соҳиби Ҷоми Италия гардида, соли 2013 ба дастаи ПСЖ ба маблағи 64 миллион евро интиқол ёфт. Тахаллусаш «Элматадор» мебошад, ки ба ин ваҷҳ як қаҳвахона дар Италия ҳам арзи ҳастӣ намудааст. Чемпиони Амрикои Ҷанубӣ дар соли 2011 ба шумор меравад.

Луис Алберто Суарес бо Кавани ҳамсол буда, 31-сола мебошад. Чун маълумоти зиёде дар бораи ин футболбози мумтоз  мавҷуд аст, ҳаминро мегӯем, ки ӯ ҳам медали тилло дорад, аз Италия не, балки аз чемпионати Голландия. Суарес  аз дастаи «Аякс»  ба Премер-Лигаи Англия ба ҳайати дастаи «Ливерпул» пайваст ва маошаш ба дусад ҳазор фунт-стерлинг дар як ҳафта баробар шуд, ки ин он замон аз ҳама баланд шуморида мешуд. Соли 2014 Суарес ба маблағи 81 млн евро ба дастаи «Барселона» гузашт. Ӯ дар қатори дастовардҳояш унвони чемпиони Уругвай, Ҳоланд, Испанияро соҳиб шуда, чандин ҷомҳоро болои сар бардоштааст. Унвони беҳтарин нишонзани дастаи мунтахаби Уругвай, беҳтарин бозингари Чемпионати Америкаи Ҷанубӣ ва Уругвай, нишонзани беҳтарини Ҳолланд, Испания, соҳиби кафши тилло ва ғайраву ғайра мебошад.

Бозингари дигаре, ки мухлисони Уругвай ба ӯ эътиқод доранд, Диего Годин -капитани дастаи мунтахаби Уругвай  ба ҳисоб меравад.  Ӯ низ дар Ла Лигаи Испания дар ҳайтаи клуби футболи Атлетикои Мадрид бозӣ мекунад. Муҳофизатгари марказӣ. Аз соли 2005 инҷониб дар ҳайати дастаи мунтахаби Уругвай 111 вохӯрӣ гузаронида, 8 гол задааст. Футболбози беҳтарини Уругвай дар соли 2014 ба ҳисоб рафта, дар корномааш унвони Чемпиони Испания, барандаи Ҷоми Испания ва Лигаи Аврупо, ду карат финалисти Лигаи чемпионҳои Аврупо ва соҳиби Ҷоми Амрикои Ҷанубиро сабт кардааст. Арзишиш дар бозори ҷаҳонӣ ба 40 миллион евро баробар аст.

Хосе Хименес дар раддабандии футболбозони беҳтарини Уругвай дар зинаи чорум мебошад. Бозингари ҷавону умедбахш дар дастаи Атлетикои Мадрид бо Диего Годин бозӣ мекунад. Ӯ ҳам муҳофизатгар аст. Соли 2013 ба «Атлетико» аз дастаи маҳалии «Данубио» ба маблағи 1 миллион евро гузаштааст. Футболбози беҳтарини Уругвай дар соли 2014 ба шумор меравад. Унвони Чемпиони Испания ва Суперҷоми ин кишварро ба худ ихтисос додааст. Якдигарфаҳмии Хосе Хименес бо капитани даста Диего Годин маҳаки асосии дастаи мунтахаби Уругвай мебошад. Дар ҳайати мунтахаби кишвараш 28 бозӣ гузаронида, се гол задааст. Ҳоло арзишаш дар бозори ҷаҳонӣ ба 28 миллион евро баробар аст.

Фернандо Муслера аз дарвозабонҳои беҳтарини Уругвай шуморида мешавад. Ҳоло дар дастаи «Галатасарай»-и Туркия аз соли 2011 бозӣ мекунад. Пештар дарвозаи дастаи «Латсио»-и Италияро нигаҳбон буд. Арзишаш дар бозори ҷаҳони 14 миллион евроро ташкил медиҳад.

Ниҳимоятгари марказӣ Матиас Весино намояндагӣ аз дастаи «Интернатсионале»-и Италия дорад. Аммо соли гузашта ба маблағи 24 миллион евро ба «Фиорентино» интиқол ёфт. Аз соли 2016 узви дастаи мунтахаб буда, дар ҳайати он 9 бозӣ гузаронида, муаллифи як гол гардидааст. Арзишаш дар бозори ҷаҳонӣ ба 11 млн евро баробар аст.

Ва ниҳоят Абел Ҳернандес -ҳамлагари дастаи «Халл Сити»-и Англия дастаи мунтахаби Уругвайро дар зинаи ҳафтум муаррифӣ мекунад. Аз соли 2010 дар ҳайати дастаи мунтахаб ҳунарнамоӣ дорад. Муаллифи 11 тӯб мебошад. Соли 2014 аз дастаи «Палермо»-и Италия ба «Хал Сити» гузашта, дар 92 бозӣ ба дарвозаи ҳарифон 31 тӯб ворид кардааст.  Арзишаш дар бозори ҷаҳонӣ ба 8 миллион евро баробар аст.

Оскар Вашингтон Табарес мураббии ин даста мебошад. Барои меҳнати софдилона ва натиҷаҳои нишондодааш бо одени «Барои хизматҳои арзандаи Федератсияи футболи ҷаҳонӣ» қадрдонӣ шудааст. Табарес беҳтарини мураббии кишварҳои Амрикои Ҷанубӣ дар солҳои 2010 ва 2011 мебошад. Ӯ соли 12 –ум аст, ки ба дастаи мунтахаби Уругвай тамрин медиҳад.

Дастаи мунтахаби Уругвай ҷои будубоши худро дар давраи бозиҳои ниҳоии Чемпионати ҷаҳон дар Нижний Новгород интихоб кард ва дар маркази варзишии «Борский» иқомат мекунад.