АЗ ОББОЗӢ ДАР ҶОЙҲОИ МАНЪШУДА ХУДДОРӢ НАМОЕД! Дар дарёи Кофарниҳон марди 48-соларо аз ғарқшавӣ наҷот доданд

ДУШАНБЕ, 09.07.2018 /АМИТ «Ховар»/. Наҷотбахшони Раёсати махсуси ҷустуҷӯӣ–наҷотбахшии Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон, ки бо мақсади пешгирӣ аз рух додани ҳодисаҳои нохуш дар обҳо навбатдорӣ ба роҳ мондаанд, дар ҳудуди ноҳияи Рӯдакӣ марди 48-соларо аз ғарқшавӣ наҷот доданд.

Дар ин бора ба АМИТ «Ховар» сухангӯи Кумитаи ҳолатҳои фавқулода ва мудофиаи гражданӣ Умеда Юсуфӣ иттилоъ дода, илова намуд, ки ҳодиса 8 июл рух додааст. Ҳангоми навбатдории нақшавӣ дар соҳили дарёи Кофарниҳон наҷотбахшони Кумитаи мазкур марди 48-сола, сокини ноҳияи Рӯдакиро аз ғарқшавӣ наҷот додаанд. Ин мард гирифтори бемории рӯҳӣ буда, пас аз наҷот ӯро ба ихтиёри мақомоти дахлдор супоридаанд.

Бо фаро расидани фасли гармо ва оғоз шудани мавсими оббозӣ Кумитаи ҳолатҳои фавқулода ва мудофиаи гражданӣ назорат дар обҳо ва мавзеъҳои шиноварии ҷумҳуриро пурзӯр карда, дар дарёҳои пуртуғён, ки оббозӣ дар онҳо иҷозат дода намешавад, бо истифода аз ғаввосон ва наҷотбахшони касбӣ навбатдории шабонарӯзӣ ба роҳ мондааст.

Ғайр аз ин, кормандони Кумитаи мазкур ҳар рӯз бо сокинони минтақаҳои гуногуни ҷумҳурӣ мулоқоту суҳбатҳо анҷом дода, ба онҳо қоидаҳо ва маконҳои оббозиро шарҳ медиҳанд ва даъват мекунанд, ки аз оббозӣ дар ҷойҳои манъшуда худдорӣ намоянд.

Аммо новобаста аз ҳушдорҳои қатъӣ сокинони ҷумҳурӣ дар чунин дарёҳо худсарона ба оббозӣ машғул шуда, ҳаёти худу наздиконашонро дар хатар мегузоранд. Аз ин сабаб, Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон бори дигар аз сокинону меҳмонони ҷумҳурӣ эҳтиромона хоҳиш мекунад, ки ҳангоми оббозӣ қоидаҳои бехатариро риоя намоянд ва дар ҷойҳои муайяншуда ба шиноварӣ машғул шаванд.

Ҳамчунин волидонро огоҳ менамояд, ки фарзандони худро ҳангоми ҳузур доштан дар лаби дарёву кӯлҳо беназорат нагузоранд.