Хонандагони Тоҷикистон дар Олимпиадаи ҷаҳонӣ аз фанни математика «IMO-2018» 5 медал ба даст оварданд

Июль 19, 2018 09:01

ДУШАНБЕ, 19.07.2018 /АМИТ «Ховар»/. Хонандагони Тоҷикистон дар Олимпиадаи ҷаҳонӣ аз фанни математика- «IMO-2018» сазовори 5 медал гардиданд.

Тавре аз Вазорати маориф ва илми Ҷумҳурии Тоҷикистон хабар доданд, олимпиадаи мазкур аз 3 то 14 июли соли равон дар шаҳри Клуҷ-Напокаи Ҷумҳурии Руминия баргузор гардид. Дар он довталабон аз 132 давлати дунё иштирок карда, Ҷумҳурии Тоҷикистонро 6 нафар хонанда муаррифӣ намуданд.

Дар ҷамъбасти олимпиада хонандагони кишвар сазовори 5 медали биринҷӣ гардиданд. Муҳаммадҷон Кличев аз Литсей барои хонандагони болаёқат дар шаҳри Душанбе, Шоҳрухи Умедҷон, Меҳрон Бобохонов, Абубакр Усмонов, Наимҷон Хонҷонов аз Литсей-интернати тоҷикӣ-русии «Ҳотам ва ПВ» дар шаҳри Душанбе сазовори ҷойи сеюм гардиданд.

Ҳамзамон Суннатулло Раҳматов аз Литсей-интернати тоҷикӣ-русии «Ҳотам ва ПВ» дар шаҳри Душанбе сазовори ифтихорномаи фахрӣ гардид.

Бино ба иттилои Вазорати маориф ва илми ҷумҳурӣ, хонандагони кишвар аз аввали соли 2018 дар 14 олимпиадаи байналмилалӣ, ки дар давлатҳои Қазоқистон, Ҳиндустон, Руминия, Россия, Малайзия, Булғория, Беларус, Ветнам, Италия, Тоҷикистон ва Иёлоти Муттаҳидаи Америка баргузор гардиданд, фаъолона иштирок намуда,  сазовори 201 медал, аз ҷумла, 47 медали тилло, 71 медали нуқра, 83 медали биринҷӣ гардиданд. Ин шумора нисбат ба ҳамин давраи соли гузашта 108 медал (33 медали тилло, 36 медали нуқра, 39 медали биринҷӣ) зиёд мебошад.

Мавриди зикр аст, ки пеш аз иштироки дастаҳо дар олимпиадаҳои байналмилалии фаннӣ аз ҷониби Маркази ҷумҳуриявии дарёфт ва рушди истеъдодҳо даври интихобӣ ҷиҳати интихоби дастаҳо гузаронида мешавад. Маркази мазкур ҷиҳати интихоби дастаи яккачини кишвар даври интихобии олимпиадаи мазкурро моҳи июн баргузор намуд, ки дар он зиёда аз 70 нафар хонанда аз муассисаҳои таҳсилоти умумии кишвар иштирок намуданд. Аз байни иштирокчиён 6 нафар хонанда барои иштирок дар даври ниҳоии олимпиада роҳхат гирифтанд.

Июль 19, 2018 09:01

Хабарҳои дигари ин бахш

Имрӯз дар ноҳияҳои кӯҳии Тоҷикистон ҳаво 16 дараҷа гарм мешавад
Масъулини Сафорати Тоҷикистон дар Русия бо фаъолони ҷамъиятӣ ва донишҷӯёни тоҷики муассисаҳои таҳсилоти олии шаҳри Қазон мулоқот намуданд
Федератсияи футболи Тоҷикистон дараҷаи тиллоии Хартияи футболи оммавии Конфедератсияи футболи Осиёро ба даст овард
Имрӯз дар шаҳри Душанбе ҳаво 18 дараҷа гарм мешавад
Имрӯз дар баъзе ноҳияҳои Тоҷикистон чангу ғубор ба амал меояд
«МегаФон Life»: Навсозиҳо ҳаётро сабуктар менамоянд
Ширкати саҳомии «Инновейтив Роуд Солюшнз ЛТД» дар Тоҷикистон IRS 17 400 тонна маводи зиддилағзиш захира намудааст
Доир ба нақши маориф дар тарбияи насли ваҳдатсоз вохӯрӣ доир гардид
Дар Ҷумҳурии Тоҷикистон Рӯзҳои фарҳанги Ҷумҳурии Мардумии Чин баргузор мегарданд
Имрӯз дар Тоҷикистон ҳавои камабри бебориш пешгӯӣ мешавад
Имрӯз дар баъзе минтақаҳои Тоҷикистон чангу ғубор ба амал меояд
Дар Суди конститутсионӣ Рӯзи Парчами давлатӣ таҷлил гардид