Лука Модрич сазовори «Тӯби тиллоӣ»-и Чемпионати ҷаҳон оид ба футбол-2018 гардид

ДУШАНБЕ, 16.07.2018. /АМИТ «Ховар»/. Ниммуҳофизатгари дастаи мунтахаби Хорватия Лука Модрич беҳтарин бозигари Чемпионати ҷаҳон оид ба футбол — 2018 дар Россия гардид. «Тӯби тиллоӣ»-и Чемпионати ҷаҳон пас аз анҷоми бозии финалӣ дар варзишгоҳи «Лужники»-и Москва ба футболбози хорватӣ тақдим карда шуд. Баъд аз анҷоми бозӣ Президенти Хорватия Колинда Грабар-Китарович, ки дар тан пироҳани дастаи мунтахаби кишварашро дошт, барои табрики Модрич ба майдон баромад.

Дастаи мунтахаби Хорватия дар финали Чемпионати ҷаҳон бо ҳисоби 2 бар 4 бар франсавиҳо мағлуб гардид.

Лука Модрич дар ин чемпионат дар 7 бозӣ ба майдон баромад, ки дар онҳо 2 гол зада, 1 партофти головар анҷом додааст. «Тӯби нуқрагӣ»-и чемпионат ба ниммуҳофизатгари белгиягӣ Эден Азар ва «Тӯби биринҷӣ» ба ҳамлагари франсавӣ Антуан Гризманн тақдим гардиданд. Ҳамчунин «Дастпӯшакҳои тиллоӣ»-и чемпионатро дарвозабони мунтахаби Белгия Тибо Куртуа ва «Кафши тиллоӣ»-ро ҳамлагари мунтахаби Англия Ҳарри Кейн соҳиб шуданд.

Модрич аввалин футболбози хорватӣ мебошад, ки унвони беҳтарин бозигари Чемпионати ҷаҳонро сазовор гардид.

Аз соли 1982 инҷониб бозигари беҳтарини Чемпионати ҷаҳон оид ба футбол ҷоизаи «Тӯби тиллоӣ»-ро соҳиб мешавад. Ҳамчунин ду бозигари дигар барои ҷойҳои дуюм ва сеюм ҷоиза мегиранд. Солҳои 1930-1978 низ сегонаи беҳтаринҳо муайн мешуд, вале ба онҳо ҷоиза тақдим намегардид. Дар тамоми таърихи чемпионатҳои ҷаҳон аз ҳама бештар футболбозони дастаи мунтахаби Бразилия (7 маротиба) беҳтарин бозигари мусобиқот гардидаанд. Аз ҷумла, Леонодис (1938), Зизинё (1950), Диди (1958), Гарринча (1962), Пеле (1970), Ромарио (1994) ва Роналдо (1998).

Дар ҳайати дастаҳои мунтахаби Аргентина (Марио Кемпес соли 1978, Диего Марадона соли 1986 ва Леонел Месси соли 2014) ва Италия (Ҷузеппе Меаттса соли 1934, Паоло Росси соли 1982 ва Салватори Скиллачи соли 1990) се нафари беҳтарин бозигарон буданд.

Ду маротиба намояндагони Уругвай – Хосе Насасси соли 1930 ва Диего Форлан соли 2010 ҷоизаи бозигари беҳтарини Чемпионати ҷаҳонро сазовор гардидаанд. Аз рӯи натиҷаҳои Чемпионати ҷаҳон-1954 футболбози Венгрия Ферентс Пушкаш, соли 1966 – англис Бобби Чарлтон, соли 1974 – ҳолландӣ Йохан Кройф, соли 2002 – дарвозабони мунтахаби Германия Оливер Кан ва соли 2006 – франсавӣ Зинедин Зидан беҳтарин бозигар дониста шудаанд.