Низоми алоқаи видеоконфронс бо раёсатҳои Вазорати корҳои дохилӣ дар маҳалҳо ифтитоҳ гардид

ДУШАНБЕ, 17.07.2018 /АМИТ «Ховар»/. Имрӯз дар толори калони Вазорати корҳои дохилӣ дар доираи ислоҳоти милитсия маросими ифтитоҳи пайваст гардидани низоми алоқаи видеоконференсия бо раёсатҳои Вазорати корҳои дохилӣ дар шаҳру вилоятҳо баргузор гардид.

Тавре ба мухбири АМИТ «Ховар» аз Вазорат хабар доданд, дар ҷамъомад Вазири корҳои дохилӣ Рамазон Раҳимзода, муовини якуми Вазири корҳои дохилӣ Абдураҳмон Аламшозода, кордори муваққатии Сафорати ИМА дар Тоҷикистон Кевин Коверт, Роҳбари ташкилоти байналмилалии «Дунёи бехатар» (Saferworld) Никола Фердинанд, намояндагони ташкилоти мазкур Хирад Каргасов ва Зоҳир Асаншоев, роҳбари ширкати «Сарфароз» Ҷаҳонгир Анваров, аъзои шӯроҳои ҷамъиятӣ оид ба мусоидати ҷомеаи шаҳрвандӣ дар таъмини тартиботи ҷамъиятии назди мақомоти милитсия дар шаҳру ноҳияҳои ҷумҳурӣ, аъзои фаъоли гурӯҳи ҷавонони «Авангард», дружиначиёни ихтиёрӣ ва кормандони ғайриштатии милитсия иштирок доштанд.

Видеоконфронс тариқи реҷаи мустақим (онлайн) доир гардида, ҳайати шахсӣ ва намояндагони ҷомеаи шаҳрвандӣ дар толорҳои раёсатҳои ВКД дар вилоятҳои Суғд, Хатлон, ВМКБ, қисми минтақавӣ оид ба гурӯҳи ноҳияҳои Кӯлоб, минтақа ва ноҳияи Рашт, РВКД дар шаҳри Душанбе ва дигар раёсатҳои дастгоҳи марказии ВКД бевосита ҷамъомадро тамошо карданд.

Зикр карда шуд, ки низоми алоқаи видеоконфронс бо дастгирии бевоситаи Иёлоти Муттаҳидаи Амрико, ташкилоти байналмилалии «Дунёи бехатар» (Saferworld) ва ширкати «Сарфароз» дар доираи ислоҳоти милитсия таъсис ёфта, робитаи милитсияро бо аҳли ҷомеа боз ҳам қавитар мегардонад.

Ба иттилои манбаъ, дар ҷараёни ҷамъомад Ёддошти тафоҳум оид ба ҳамкорӣ байни Вазорати корҳои дохилии Ҷумҳурии Тоҷикистон, Сафорати ИМА ва ташкилоти байналмилалии «Дунёи бехатар» (Saferworld) ба имзо расонида шуд.