Дар Тоҷикистон фестивали байналмилалии ҷавонони ИДМ ва СҲШ баргузор мегардад

ДУШАНБЕ, 17.08.2018. /АМИТ «Ховар»/. Аз  28 август то 1 сентябри соли равон дар шаҳрҳои Душанбе ва Гулистон Фестивали байналмилалии ҷавонон ва донишҷӯён дар мавзӯи «Тоҷикистон ва Роҳи Абрешим: дирӯз ва имрӯз» («Таджикистан и Шёлковый путь: история и современность»), озмун – намоишгоҳи байналмилалии ҷавонон дар мавзӯи  «Чашмаҳо –набзи ҳаёт» («Родники – пулсь жизни») ва ташкили мактаби иҷтимоӣ – инноватсионӣ баргузор мегардад.

Тавре ба АМИТ «Ховар» аз Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар доданд, иқдоми мазкур бо ташаббуси Кумита дар доираи ҳамкории мутақобилан судманд бо Кумитаи иҷроияи Иттиҳоди Давлатҳои Мустақил (ИДМ) ва Котиботи Созмони ҳамкории Шанхай (СҲШ) бо даъвати роҳбарони мақомоти давлатии кор бо ҷавонон ва намояндагони ҷавонони аъзои давлатҳои ИДМ ва СҲШ ба роҳ монда шудааст.

Дар назар аст, ки дар чорабинии мазкур 100 нафар иштирокчиён аз давлатҳои аъзои ИДМ ва СҲШ иштирок менамоянд.