ВАХШ: ҳамкории милитсия бо ҷомеа метавонад ҳама гуна амалу кирдори зиддиҳуқуқиро бартараф намояд

ДУШАНБЕ, 10.08.2018. /АМИТ «Ховар»/. Имрӯз терроризм ва экстремизм ҳамчун вабои аср ба амнияти ҷаҳон ва ҳар як сокини сайёра таҳдид карда, барои башарият хатар эҷод кардааст. Ва шомилшавии шаҳрвандон, алалхусус ҷавонон ба ин гурӯҳҳои ифротгаро, ки оқибатҳои нангинро дар пай дорад, боиси нигаронии аҳли ҷомеа гаштааст. Ин нуктаро сардори шуъбаи ВКД дар ноҳияи Вахш Рустам Аҳмадзода зимни вохӯрӣ бо сокинони ҷамоати шаҳраки Кирови шуъбаи 1-уми ноҳияи Вахш зикр намуд.

Дар ин бора аз Вазорати корҳои дохилӣ ба мухбири АМИТ «Ховар» хабар доданд. Ба иттилои манбаъ, дар вохӯрӣ ҳамчунин таъкид гардидааст, ки «танҳо эҳтиром ба манфиатҳои ҳамдигар, номуси баланди ватандорӣ, пос доштани арзишҳои миллӣ ва муттаҳид шудани ҳамаи кишварҳои дунё дар пешорӯи ин хатари умумӣ тақозо менамояд, ки садди роҳи ин вабо гирифта шавад».

Дар ҷамъомад иштирокдорони касбу кори гуногун низ атрофи ин хатари умумибашарӣ ибрози андеша намуда, зикр карданд, ки ҳамкории мутақобилан судманди милитсия бо ҷомеа метавонад ҳама гуна амалу кирдори зиддиҳуқуқиро бартараф намояд.

Дар рафти вохӯрӣ кормандони мақомоти милитсия аз аҳли ҷомеа даъват ба амал оварданд, ки барои пешгирӣ ва рафъи зуҳуроти халалдоркунандаи тартиботи ҷамъиятӣ саҳмгузор бошанд.