«Фарҳанги сиёсии ҷавонон чун омили боздорандаи тундгароии динӣ»-таҳти ин унвон яке аз муаллифони фаъоли АМИТ «Ховар» рисолаи номзадӣ ҳимоя намуд

ДУШАНБЕ, 21. 09.2018 /АМИТ «Ховар»/. 14 сентябр яке аз муаллифони ҷавон ва фаъоли мо–сармутахассиси Раёсати омӯзиши масъалаҳои амнияти минтақавии Маркази тадқиқоти стратегии назди Президенти Ҷумҳурии Тоҷикистон Ҳикматулло Хоҷаев дар мавзӯи «Фарҳанги сиёсиии ҷавонон чун омили боздорандаи тундгароии динӣ» рисолаи номзадӣ ҳимоя намуд.

Бояд гуфт, ки Ҳикматулло Хоҷаев  рисолаи номзудии худро дар шуъбаи сиёсатшиносии Институти фалсафа, сиёсатшиносӣ ва ҳуқуқи ба номи А.Баҳоваддинови Академияи илмҳои Ҷумҳурии Тоҷикистон зери роҳбарии доктори илмҳои фалсафа Рустам Ҳайдаров, ки роҳбарии шуъбаи мазкурро ба уҳда дорад, дифоъ кард.

«Дар асри 21 бунёдгароии динӣ ба яке аз мураккабтарин проблемаҳои сиёсат ва робитаҳои байналмилалӣ табдил ёфтааст»,-  гуфт Ҳикматулло Хоҷаев дар суҳбат бо мухбири АМИТ «Ховар» ва илова намуд, ки аҳамияти рисолаи илмӣ дар он аст, ки дар замони муосир проблемаи терроризм, ифротгароии динӣ ва муқобилият  бо ин падидаи манфӣ яке аз масоили муҳимтарини ҳам давлатҳои алоҳида ва ҳам ҷомеаи байналмилалӣ гардидааст.

Номбурда дар таҳқиқоти худ омилҳои бавуҷудоварандаи бунёдгароӣ ва ифротгароии диниро аз назари сиёсӣ мавриди омӯзиш қарор дода, зикр намудааст, ки «сабаби ифротгароӣ ва бунёдгароии динӣ дар шароити муосир на таълимоти динӣ, балки ҳадафҳои сиёсӣ ва манфиатҳои инфиродӣ ва иқтисодӣ мебошад».

P.S. АМИТ «Ховар» Ҳикматулло Хоҷаевро   бо ин дастоварди илмӣ самимона табрик мегӯяд ва изҳори умедворӣ менамояд, ки минбаъд низ  бо мақолаву гузоришҳои ҷолибаш дар ВАО, аз ҷумла дар сомонаи мо дар роҳи баланд бардоштани фарҳанги сиёсии ҷавонон ва мубориза бо ифротгароӣ ва тундгароии динӣ, ки аз омилҳои ба гуруҳҳои экстремистию террористӣ гаравидани ҷавонон маҳсуб меёбанд, муборизаи хастанопазир хоҳад бурд.