Мулоқоти Сарвазири Тоҷикистон Қоҳир Расулзода бо Вазири корҳои хориҷии Покистон Мақдум Шах Маҳмуд Курейшӣ

ДУШАНБЕ, 11.10.2018. /АМИТ «Ховар»/. Имрўз мулоқоти  Сарвазири мамлакат Қоҳир Расулзода бо  Вазири корҳои хориҷии Ҷумҳурии Исломии Покистон  Мақдум Шах Маҳмуд Курейшӣ баргузор шуд.

Мақдум Шах Маҳмуд Курейшӣ дар кори ҷаласаи навбатии Шўрои Сарони Ҳукуматҳо-Сарвазирони давлатҳои аъзои Созмони Ҳамкории Шанхай ҳамчун  намояндаи расмии кишвари аъзои созмон иштирок менамояд.

Дар мулоқот аз сатҳу сифати ҳамкории байниҳукуматии Тоҷикистон ва Покистон изҳори қаноатмандӣ карда, ҳарду ҷониб омодагию ҳавасмандии худро барои  рушд ва тавсеаи минбаъдаи ҳамкориҳои сиёсӣ, тиҷоратӣ, иқтисодӣ ва сармоягузорӣ дар доираи кори Комиссияи муштараки Тоҷикистону Покистон оид ба ҳамкориҳои тиҷоратию иқтисодӣ таъкид намуданд.

Доир ба иҷрои саривақти мувофиқаҳои байнидавлатӣ дар сатҳи сарони ду давлат низ табодули афкори судманд анҷом дода шуд.

Ҷонибҳо ҳамчунин масъалаҳои марбут ба иштироки муштараки Тоҷикистон ва Покистонро дар татбиқи лоиҳаи бузурги минтақавии хатти интиқоли  барқи баланшиддати КАСА-1000  баррасӣ намуданд.