Шӯрои соҳибкорони Тоҷикистону Урдун созмон дода мешавад
ДУШАНБЕ, 16.10.2018/АМИТ «Ховар»/. Доираҳои тиҷоратӣ ва сармоягузорони Шоҳигарии Ҳошимии Урдун тасмим доранд, ки дар оянда дар бахши сохтмони биноҳои баландошёнаи истиқоматӣ, бунёди роҳ ва кишоварзӣ, хусусан коркарди меваю сабзавот дар Тоҷикистон саҳм гузоранд. Дар ин росто, имрӯз масъалаи тавсеаи ҳамкорӣ бо доираҳои соҳибкорон ва тоҷирони Урдун дар мулоқоти раиси Палатаи савдо ва саноати Тоҷикистон Шариф Саид бо ҳайати доираҳои тиҷоратии Шоҳигарии Ҳошимии Урдун дар Душанбе баррасӣ гардид.
Раиси Палатаи савдо ва саноати Тоҷикистон ҳайати тиҷоратии Урдунро бо имкониятҳои сармоягузорӣ дар кишвар ошно намуда, гуфт, ки Тоҷикистон бо захираҳои бои табиӣ ва мавқеъияти хоси ҷуғрофияш дар минтақаи Осиёи Марказӣ дорои иқтидорҳои бузурги иқтисодию тиҷоратӣ буда, барои сармоягузорон дар самти татбиқи лоиҳаҳои сармоягузорӣ тамоми имкониятҳои мусоид фароҳам оварда шудааст.
Зикр шуд, ки Тоҷикистон аъзои созмонҳои бонуфузи молиявӣ, аз ҷумла Созмони Ҷаҳонии Тиҷорат буда, дар мамлакат минтақаҳои озоди иқтисодӣ, назири «Суғд», «Данғара», «Панҷ» ва «Ишкошим» таъсис дода шудаанд.
Бояд тазаккур дод, ки ҳайати соҳибкорони Урдун ҷиҳати иштирок дар Форуми чоруми байналмилалии соҳибкории Душанбе 2018, ки таҳти унвони «Рушди соҳибкорию сармоягузорӣ ва равандҳои муосири иқтисодӣ» 15 октябр дар шаҳри Душанбе доир гардид, ба Тоҷикистон ташриф овардаанд.
Интизор меравад, ки дар доираи сафар ба Тоҷикистон соҳибкорони Урдун бо имкониятҳои иқтисодию сармоягузорӣ дар Тоҷикистон шинос гардида, дар самти тавсеаи ҳамкорӣ ва табодули таҷриба бо доираҳои соҳибкорони тоҷик мулоқот анҷом диҳанд.
Ташрифи ҳайати соҳибкорони Урдун ба Тоҷикистон дар ҳолест, ки моҳи декабри соли 2017 дар шаҳри Амон- пойтахти Шоҳигарии Ҳошимии Урдун зимни сафари расмии Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Шоҳигарии Ҳошимии Урдун байни Палатаи савдо ва саноати Ҷумҳурии Тоҷикистон ва Палатаи савдои Шоҳигарии Ҳошимии Урдун Созишномаи ҳамкорӣ ба имзо расида буд.
Инчунин Созишнома дар бораи таъсиси Шӯрои соҳибкорони Ҷумҳурии Тоҷикистон ва Шоҳигарии Ҳошимии Урдун ба имзо расонида шудааст, ки интизор меравад дар оянда байни ду давлат Шӯрои соҳибкорон созмон дода шавад.
Марзия САИДЗОДА,
АМИТ «Ховар»
Губернатори Ҳукумати мардумии музофоти Шэнсии Чин бо фаъолияти Минтақаи озоди иқтисодии «Данғара» шинос шуд
Тоҷикистон дар муборизаи байналмилалӣ барои ҳифзи бабри барфӣ саҳм мегузорад
МАСЛИҲАТИ МУТАХАССИС. Норасоии намӣ ба решаи дарахтон самаранокии боғотро паст мекунад
Густариши ҳамкории вилояти Хатлон бо музофоти Шэнсӣ баррасӣ шуд
Дар Душанбе ҳамкории иқтисодӣ ва татбиқи лоиҳаҳои муштараки Тоҷикистону Чин баррасӣ гардид
РӮЗИ ҶАҲОНИИ БЕХАТАРИИ ОЗУҚАВОРӢ. Бо мақсади таъмини бехатарии маҳсулот дар Тоҷикистон 14 озмоишгоҳ фаъолият дорад
Сарфаи неруи барқ танҳо вазифаи давлатӣ нест, балки масъулияти ахлоқии ҳар як шаҳрванди мамлакат аст
«IMPERIУA TECHSTREAM — 2025». Дар Душанбе барои наврасон нахустин озмуни технологияҳои иттилоотӣ баргузор гардид
РӮЗИ БАЙНАЛМИЛАЛИИ МУҲИТИ ЗИСТ. Баҳодур Шерализода: «Ҷомеаи ҷаҳон Тоҷикистонро ҳамчун давлати ташаббускор дар соҳаи обу иқлим ва ҳифзи пиряхҳо эътироф намудааст»
Бонки рушди Созмони ҳамкории Шанхай таъсис дода мешавад
Байни Тоҷикистон ва Қирғизистон Протокол оид ба мубодилаи маълумоти пешакии гумрукӣ дар бораи интиқоли молу воситаҳои нақлиёт ба имзо расид
Ҷаласаи 80-уми Шурои роҳбарони хадамотҳои гумруки давлатҳои иштирокдори Иттиҳоди Давлатҳои Мустақил баргузор гардид
