Ҷумҳурии Тоҷикистонро дар Чемпионати ҷаҳон оид ба гӯштин як варзишгар намояндагӣ мекунад

 ДУШАНБЕ, 19.10.2018 /АМИТ «Ховар»/.  Рӯзҳои 20-28 октябр дар пойтахти Венгрия–шаҳри Будапешт чемпионати ҷаҳон оид ба гӯштин (тарзи озод, юнонӣ-римӣ) баргузор мешавад.

Тавре ба хабарнигори АМИТ «Ховар» аз Кумитаи миллии олимпии Тоҷикистон хабар доданд,  дар мусобиқа иштироки 860 нафар варзишгар аз 114 давлати дунё дар назар аст. Қувваозмоиҳои гӯштини юнонӣ-римӣ дар вазни -59кг; -66кг; -71кг; -75кг; -80кг; -85кг; -98кг; -130кг, тарзи озод дар вазни -57кг; -61кг; -65кг; -70кг; -74кг; -86кг; -97кг; -125 кг ва гӯштини занон дар вазни -48кг; -53кг; -55кг; -58кг; -60кг; -63кг; -69кг; -75кг доир мешаванд.

Ёдовар мешавем, ки   Тоҷикистонро   дар  ин чемпионати ҷаҳон як варзишгар – Гамид Ҷалилов дар вазни -74 кг аз намуди гӯштини озод муаррифӣ мекунад.

Ноиби раиси Федератсияи гӯштини Тоҷикистон Шодӣ Баҳромов ҷиҳати иштирок дар конференсияи Иттиҳоди ҷаҳонии гӯштин, ки дар доираи чемпионати ҷаҳон доир мешавад ва Ҳабибулло Нарзуллоев ба ҳайси довари дараҷаи байналмилалӣ ба ин мусобиқаи варзишӣ сафарбар гардидаанд.