«МАВҚЕЪ»: Барномаи таҳлилии Хуршеди Ховар (Ҳамдам) дар Радиои «FM Ховар». Нашри нуздаҳум

09.11.2018с.

16 ноябри ҷорӣ нахустин агрегати Неругоҳи барқӣ – обии «Роғун» мавриди истифода қарор мегирад. Ин рӯйдоди фараҳбахш ба Рӯзи Президенти Тоҷикистон- 16 ноябр рост меояд. Ин дар ҳолест, ки аз оғози бунёди сарбанди Неругоҳи барқи обии «Роғун» ду сол сипарӣ гардид. Тирамоҳи соли 2016 дар шаҳри Роғун бо иштироки бевоситаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон маҷрои дарёи Вахш иваз карда шуда, ба бунёди ин мавзеъи муҳими иншоот оғози расмӣ бахшида шуд. Дар он рӯзи фаромӯшнопазир Пешвои миллат муҳтарам Эмомалӣ Раҳмон худ савори булдозери вазнин аз соати 10-и субҳ то 11:30, расо якуним соат бо пеш кардани сангу шағал маҷрои дарёи Вахшро иваз карда, обро тариқи нақбҳои бузурги обгузар равона сохта, ба бунёди сарбанди Неругоҳи барқи обии «Роғун», ки барои мардуми Тоҷикистон ҳаёту мамот ҳисоб мешавад, ҳусни оғоз бахшиданд ва  онро «яке аз марҳилаҳои муҳими сохтмони ин иншооти бузург» арзёбӣ намуданд. Ҳоло нахустин чархаи неругоҳ мавриди истифода қарор мегирад.

Шореҳи мо  Хуршеди ХОВАР (Ҳамдам)  дар барномаи нави муаллифӣ ва таҳлилии «Мавқеъ» дар Радиои «Ховар» бо ширкати  Хайрулло Асозода, вакили мардумӣ аз Кумитаи энергетика, сохтмон, нақлиёт ва коммуникатсияи Маҷлиси намояндагони Маҷлиси Олии Ҷумҳурии Тоҷикистон, Аброр Мирсаидов, муовини директори Пажуҳишгоҳи иқтисодиёти Академияи Илмҳои ҶТ ва Холназар Юнусов, муовини сардори Раёсати энергетикии Вазорати энергетика ва захираҳои оби ҶТ ин мавзӯъро баррасӣ гирифтааст.