Ҳайати Тоҷикистон дар мулоқоти сатҳи баланд дар шаҳри Ню-Йорк иштирок намуд

ДУШАНБЕ, 06.12.2018 /АМИТ «Ховар»/. 4 декабри соли 2018 дар қароргоҳи СММ дар шаҳри Ню-Йорк муовини Вазири рушди иқтисод ва савдои Ҷумҳурии Тоҷикистон Тоҷиддин Ҷӯразода  дар Мулоқоти сатҳи баланд ҷиҳати баррасии мушкилиҳои кишварҳои даромадашон миёна дар амалисозии Рӯзномаи 2030 оид ба рушди устувор ширкат ва суханронӣ намуд.

Тавре ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд, Тоҷиддин Ҷӯразода зимни суханронии худ изҳор намуд, ки давоми 15 соли охир Тоҷикистон ба пешравиҳои назаррас, аз ҷумла дар соҳаҳои иқтисодӣ ва иҷтимоӣ ноил гардидааст. Тазаккур дода шуд, ки дар ин давра ду стратегияи коҳиши камбизоатӣ барои солҳои 2007-2009, 2010-2012 ва Стратегияи миллии рушд то соли 2030 қабул гардидаанд.

Ҳамчунин зикр гардид, ки бинобар гузаронидани ислоҳот ва татбиқи барномаҳо ва стратегияҳои дахлдор, Тоҷикистон ба пешравии назаррас дар паст кардани сатҳи камбизоатӣ аз 81% то 30,3% ноил гардидааст.