Имрӯз дар тамоми Тоҷикистон филми ҳуҷҷатии «Марди роҳ» намоиш дода мешавад

ДУШАНБЕ, 19.12.2018 /АМИТ «Ховар»/. Имрӯз, 19 декабри соли 2018 дар тамоми корхонаву муассисаҳои  шаҳру ноҳияҳои ҷумҳурӣ намоиши филми ҳуҷҷатии «Марди роҳ» баргузор мегардад. Иқдоми мазкур бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо Муассисаи давлатии телевизиони «Сафина»  роҳандозӣ шудааст.

Тавре аз  маркази матбуотии Кумитаи кор бо ҷавонон ва варзиш  ба АМИТ «Ховар» хабар доданд, филми ҳуҷҷатии «Марди роҳ» ба ҳаёт ва фаъолияти ибратбахши Пешвои миллат муҳтарам Эмомалӣ Раҳмон  бахшида шудааст. Мақсад  аз намоиши филми ҳуҷҷатии «Марди роҳ» расидан ба қадри Истиқлолияти давлатӣ, ваҳдати миллӣ, ҳифзу гиромидошти арзишҳои бузурги даврони соҳибистиқлолӣ, хусусан эҳтиром ва арҷгузорӣ ба заҳмату талошҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мебошад.

Намоиши дастаҷамъонаи филми мазкур дар тамоми шаҳру ноҳияҳои мамлакат бо ҷалби намояндагони аҳли зиё ва доираи васеи ҷавонон ба нақша гирифта шудааст.

Ҳамчунин имрӯз бо ҷалби 700 нафар кормандони ҷавони вазорату идораҳо филми «Марди роҳ»  дар толори  Маркази «Вефа» намоиш дода мешавад. Пас аз намоиши филми мазкур аз ҷониби аъзои маҳфили «Пайравони Пешвои миллатем!» – и Кумитаи кор бо ҷавонон ва варзиш аксияҳои тарғиботӣ таҳти унвони «Бо Президентам ифтихор мекунам!», «Ҷавонон – пайрави Пешвои миллат», «Мо Шуморо дӯст медорем – Пешвои миллат!» доир шуда,  нишони сарисинагӣ, ки дар он акси Пешвои миллат таҷҷасум ёфтааст,  тақсим карда мешавад.